Үндэстний ТОЙМ сэтгүүл сар шинийн өмнөхөн 466 дахь дугаараа уншигчиддаа хүргэж байна. Энэ удаагийн дугаарт төрийн мөнгөн дэвсгэрт дээр ахин нэг дүр төрх нэмэх санааг дэвшүүлжээ. Тэрхүү дүр төрх нь Монголын орчин үеийн уран зохиолыг үндэслэгч Дашдоржийн Нацагдорж. Онцлох нийтлэлд дэлхийн улс орнуудын төрийн мөнгөн дэвсгэртийг зурагжуулдаг уламжлал, төрийн мөнгөн дэвсгэрт дээр зохиолчдыг залах түгээмэл үзэгдлийн талаар хөндөхөөс гадна зохиолч Д.Нацагдоржийн амьдрал уран бүтээл, ховор гэрэл зургуудаас бүтэх он цагийн дарааллыг багтаасан байна.

Энэ долоо хоногийн онцлох эшлэлээр ажлаа эрчтэй эхлүүлж, өнгөрсөн долоо хоногийн турш салбарын боддлого тодорхойлогчидтой уулзсан БШУ-ны сайд Л.Энх-Амгалангийн хөндсөн өнцгүүдийг түүвэрлэлээ.

Сүүлийн үед халуун мэтгэлцээний сэдэв болоод байгаа “шашны нөхөн олговор”-ын асуудлыг тоймч Х.Батсайхан хөндсөн бол хуулийн хол найруулга, бүрхэгдүүлсэн заалтын үр дагаварын талаар тоймч Л.Нарантөгс бичлээ. Үндсэн хуулиар олгогдоогүй эрх мэдлийг хууль батлуулах замаар өөртөө бий болгодог засаглалын гаж үзэгдлийг тоймч С.Шийлэгтөмөр шүүмжилжээ.

Монгол Улс ковид19 цар тахал голомтлон тархах байдлаас “алаг цоог” үе рүүгээ орж байгаа талаар нийтлэлч Б.Цэнд-Аюуш бичжээ. Цар тахлын дараагийн түвшинд улсаараа бэлэн эсэхийг түүний нийтлэлээс унших боломжтой. Хөдөө аж ахуйн салбарт буй ужгирсан асуудлуудын шийдлийг нийтлэлч Б.Болор-Эрдэнэ эржээ. Сэтгүүлч Д.Дашдуламын бэлтгэдэг “Улаанбаатарын хүмүүс” булангийн энэ дугаарт суурь мэргэжлээ өөрчлөн амьдралаа түвшин авч яваа хоёр эзэгтэй түүхээ хүүрнэлээ.

Апартейд дэглэмийн хор уршиг нь одоо болтол арилаагүй буй ӨАБНУ-д газрын шинэчлэлийг дагалдан үүсэж буй нийгмийн хямрал, үр дагаварын талаар тоймч Х.Батсайханы нийтлэл шинэ дугаарт багтжээ. Түүнчлэн цар тахлын үед дэлхийн нийтийн үзэгдэл болж буй дугуйн хэрэглээний талаар сонирхолтой нийтлэлийг С.Лхагвасүрэн бичжээ.

Монголд долоо хоног бүр уншигчиддаа хүрдэг улс төр, нийгмийн, анализын цор ганц сэтгүүл болох Үндэстний ТОЙМ сэтгүүлийг захиалан уншаарай. “Үндэсний ТОЙМ”. Харах өнцгийг тэлнэ.