А.Амбасэлмаа: Халдвартай эхээс төрсөн нярайгаас 2-3 хоногийн дараа шинжилгээ авна

"Өргөө" амаржих газарт амаржсан эхээс өчигдөр PCR шинжилгээ авахад халдвар илэрсэнтэй  холбоотойгоор ХӨСҮТ рүү өчигдөр орой хүргэсэн. Тэрээр энэ сарын 14-ний өдөр эмнэлэгт анх хэвтэхдээ өвчний эмнэл зүйн шинж тэмдэггүй байжээ. Өнөөдрийн байдлаар ч коронавирусний шинж тэмдэггүй байгаа гэж ХӨСҮТ-ийн Тандалт судалгааны албаны дарга А.Амбасэлмаа хэлсэн юм.

Нэгдүгээр төрөхөд амаржсан эмэгтэйн гэр бүлийн таван хүний шинжилгээнд халдвар илэрсэн. Үүнтэй холбоотойгоор Өргөө амаржих газрын ажилчид, үйлчлүүлэгчид нийт 357 хүнд шөнө шинжилгээ хийхэд урьдчилсан байдлаар халдвар илрээгүй байна.

Эргэн сануулахад, гадаадаас ирсэн иргэдийг халдвар хамгааллын дэглэм сахиулан тусгаарлалтын байранд ажиглан тусгаарлах болсон цагаас хойш тусгаарлалтын байрнаас хэд хэдэн ээжийг ХӨСҮТ-д эх барьж авсан тохиолдол бий.

Тэгвэл Монгол Улсын хэмжээнд анх удаа халдвартай жирэмсэн ээж амаржсан нь өчигдрийн тохиолдол юм. Түүний хүүхдээс халдвар илэрсэн эсэх талаар ХӨСҮТ-ийн Тандалт судалгааны албаны дарга А.Амбасэлмаагаас тодруулахад “Нярайгаас шинжилгээ аваагүй. 2-3 хонож байж шинжилгээ авна. Халдвар авсан ээжтэйгээ тусгаарлалтад байгаа нярай халдвар авсан тохиолдол байхгүй учраас гайгүй байх” хэмээх хариултыг өглөө.

БНХАУ-ын ӨМӨЗО-д Covid-19-ийн халдвартай жирэмсэн эмэгтэй 2 сарын турш эмнэлгийн хяналтад эмчилгээ хийлгэн 4-р сарын эхээр амаржсан бөгөөд нярай коронавирусийн халдвар (IgG)-ийн эсрэгбиетэй төрсөн байна. Энэ нь хамгаалах шинжтэй эсрэгбиет бөгөөд эхээс урагт дамжсан байж болзошгүй байна. Харин коронавирусийн халдвар эхээс урагт ургийн ус болон цусаар дамжин халдварладаг байж болзошгүй тул жирэмсэн эмэгтэйчүүдэд тавих анхаарлаа сулруулж болохгүйг мэргэжилтнүүд анхааруулсаар байгаа.

"Лансет сэтгүүлд хэвлэгдсэн судалгаагаар коронавирусийн халдвар авсан 119 эхээс төрсөн 120 хүүхдэд халдвар аваагүй болохыг тогтоожээ. Судлаачид хүүхэд хөхүүлэхээс бусад үед хоёр метрийн зайд тусад нь байлгаж, хөхүүлэхдээ амны хаалт зүүх, гар, хөхийг угаах зэрэг урьдчилан сэргийлэх арга хэмжээг сайтар авснаар эхээс хүүхдэд халдвар авахгүй байх боломжтой гэсэн дүгнэлтэд хүрсэн байна. Мөн “Ковид-19” халдвартай эмэгтэйгээс төрсөн 707 нярайн 11 нь эхээс урагт халдвар дамжсан болох нь батлагджээ. Ер нь амьсгалын замын энэхүү өвчин эхээс урагт шилжих нь ховор байдаг юм. Өвчилсөн нярайн эмнэлзүйд уушгины хагалгааны шинж тэмдэг давамгайлж байсан. Эмнэлзүйн бусад шинжээс халуурах, нойргүйдэх, ходоод гэдэсний шинж тэмдэг илэрч байсан бөгөөд бүгд эдгэрч эмнэлгээс гарчээ.

 

 

---