С.Ганбаатар: Ерөнхий сайдаас Оюутолгойн гэрээг Монголд ашигтай байлгахын төлөө ажиллахыг шаардаж байна
УИХ-ын гишүүн С.Ганбаатар Оюутолгойн гэрээтэй холбоотой асуудлаар мэдээлэл хийлээ. Тэрбээр "Бид 360-400 тэрбум ам.долларын үнэтэй Оюутолгойн баялгаа гаднынханд өгсөн. "2051 он хүртэл ямар ч ногдол ашиг авахгүй. 22 тэрбум ам.долларын өрөнд орно" гэж "Рио Тинто"-гоос албан ёсоор мэдэгдлээ.
Монголын иргэдэд хортой энэ хөрөнгө оруулалтын гэрээг цуцалж, цоо шинээр байгуулах түүхэн алтан боломжийн талаар би одоо ярих гэж байна. "Рио Тинто" нь хэлэлцээрт орсон Монгол Улсын сайд нарт авлига өгсөн нь дөрвөн улсын шүүхээр нотлогдоод байна.
Ерөнхий сайд У.Хүрэлсүх Оюутолгойн гэрээгээр хохирсон Монголын ард түмнийг төлөөлж, олон улсын шүүхэд нэхэмжлэл гаргах эрхтэй цор ганц хүн. Тиймээс Ерөнхий сайд У.Хүрэлсүхэд Монголын ард түмнийг өмгөөлөх эрхээ хэрэгжүүлэхийг хүсэж, шаардаж байна. УИХ-д ч олон улсын шүүхэд яригдаж байгаа асуудлуудын талаар мэдэгдэл гаргахыг хүссэн. Хөрөнгө оруулалтын гэрээг Монголд ашигтай байдлаар цоо шинээр байгуулах алтан боломжийг битгий алдаач. Би өмнө нь найман Ерөнхий сайдад хэлж байсан. Одоо дахин хэлье.
Ерөнхий сайд нэгдүгээр сард багтаж, нэхэмжлэл гаргахгүй бол хөрөнгө оруулалтын гэрээг сайжруулах алтан боломжоо алдана.
АНУ-ын Нью-Йорк дахь Мужийн дээд шүүх дээр "Оюутолгой"-той холбоотой хэргийг хэлэлцэж байна. Экспертийн дүгнэлтээр "Оюутолгой"-н гэрээ нь Монгол Улсын Иргэний хуулийн 56.1.1 дэх зүйл заалтыг зөрчсөн "Хүчин төгөлдөр бус хэлцэл" гэж үзжээ. Хэргийн талаар АНУ-ын Нью-Йорк дахь Мужийн дээд шүүх цахим системдээ олон нийтэд нээлттэй байршуулсан байна. Хэргийн талаар iapp.courts.state.ny.us/iscroll хаягаар орж мэдээлэл авч болно. Иймд Оюутолгойн гэрээг монголчуудад ашигтай байлгахын төлөө ажиллахыг Ерөнхий сайдаас шаардаж байна" гэлээ.