Эрүүл мэндийн яамнаас өнөөдрийн мэдээллийн цагаар өчигдөр 32 хүний шинжилгээнээс халдвар илэрсэн талаар мэдээллээ. 32 тохиолдол Улаанбаатар хотод бүртгэгдсэн байна. Тодруулбал, Баянгол дүүргийн 12 дугаар хорооны 19 дүгээр байрны нэг орцны зургаан айлын 13 хүнээс коронавирусийн халдварт өртжээ. Тухайн байрнаас өмнө нь батлагдсан 2 тохиолдол бүртгэгдсэн байсан учраас хоёр дахь удаагаа тусгаарлагдаж байгаа гэнэ. Орцонд нь халдвар илэрсэнтэй холбоотойгоор оршин суугчдын ажилладаг газруудад тандалт хийхэд тэдний дотор ЭХЭМҮТ-ийн яаралтай тусламжийн тасгийн эмч байсан учраас тус төв дээр халдварын голомтын хариу арга хэмжээг авч ажилласан байна. Өчигдөр ЭХЭМҮТ-ийн 900 гаруй хүн шинжилгээнд хамруулсан бөгөөд одоогоор 600 гаруй хүний шинжилгээний хариу сөрөг гараад байна. Бусад шинжилгээ тандалт үргэлжлэн хийгдэж байгаа талаар мэдээллээ.

Орцны халдварын тухайд амьсгалын болон агаар дуслын замаар коронавирус халддаг учраас агааргүй орчинд тархсан байх магадлалтай гэв. Иймд иргэд амны хаалт зүүнзай барих арга хэмжээг хэрэгжүүлэхийг ЭМЯ-наас уриаллаа.