УИХ-ын ээлжит чуулган бүр завсарлахаасаа өмнө дараагийн чуулгаанаар хэлэлцэх асуудлынхаа дарааллыг тогтоосон тогтоолын төслийг хэлэлцэн баталдаг. Үүний дагуу ирэх гуравдугаар сарын 15-нд эхлэх хаврын чуулганаар хэлэлцэх асуудлын дарааллыг тогтоох тухай тогтоолын төслийг энэ долоо хоногт Байнгын хороо, чуулганы хуралдаанаар хэлэлцэхээр төлөвлөөд байсан юм. Гэвч боловсруулж дуусаагүй гэдэг шалтгаанаар хойшлуулж ирэх долоо хоногт хэлэлцэхээр боллоо.
Төрийн байгуулалтын байнгын хорооны дарга Л.Энх-Амгалан энэ талаар хэлэхдээ "УИХ-ын 2021 оны хаврын чуулганаар хэлэлцэх хууль, тогтоолын төслийн саналыг намын бүлгүүд, бусад Байнгын хороо, Ерөнхийлөгчөөс авсан. Нийтдээ 265 төслийн санал ирсэн. Ийм их хууль, тогтоолын төслийг ганц чуулганаар хэлэлцэх боломжгүй. Тиймээс энэ төслүүдийг ангилан түүвэрлэж эрэмбэлэх шаардлага үүссэн. Энэ үндэслэлээр уг асуудлыг ирэх долоо хоногт хэлэлцүүлэхээр хойшлуулах горимын санал гаргаж байна" гэсэн юм. Түүний саналыг Байнгын хорооны хуралдаанд оролцсон гишүүд дэмжсэнээр хойшлууллаа.
