Манай улс коронавируст цар тахлын эсрэг вакциныг энэ оны эхний улиралд оруулж ирж, бүх нийтийн вакцинжуулалтыг эхлүүлнэ гэдгийг УОК-оос мэдэгдсэн. Харин аль улсын ямар вакцин оруулж ирэхийг УОК, Засгийн газраас байгуулсан ажлын хэсгийнхэн судалж, шийдвэрлүүлэх юм. Энэ талаар Эрүүл мэндийн сайд Т.Мөнхсайхан "Монгол Улс олон улсын КОВАКС хөтөлбөрт хамрагдсан бөгөөд энэ хөтөлбөрийн хүрээнд авах вакциныг 2021 оны эхний улиралд багтаан вакцин оруулж ирэхээр тооцож байгаа. Хамгийн өндөр үр дүнг үзүүлж байгаа "Pfizer", "Moderna", "Astrazeneca" компанийн үйлдвэрлэж буй коронавирусийн вакцины бүртгэлийг Монгол Улсын эмийн бүртгэлд оруулаад байна" гэсэн юм. Харин халдварын тархалт хурдацтай нэмэгдэж, нөхцөл байдал хүндэрвэл хоёр хөршийн вакциныг оруулж ирэх магадлал өндөр байгаа юм. Энэ үүднээс "Зүрх мартахгүй" төслийг хэрэгжүүлэгч Б.Болдсайхан эмчийн бичсэн БНХАУ болон ОХУ-д үйлдвэрлэж буй Ковид19-ийн вакцины ялгаа, онцлог шинжийн талаар хүргэе.
Хятадын СИНОВАК вакцин
Бөмбөрцөг дээр бэлэн болсон 4−5 вакцин дотроос Синовак хамгийн найдвартайд тооцогдож байгаа ба үйлдвэрлэхэд өртөг өндөртэй, хугацаа шаарддаг онцлогтой. Гэвч Хятад улс ямартаа ч амжилтад хүрч вакцинжуулалтаа эхлүүлээд байна. Энэхүү вакцин нь ердийн вакцинуудыг гаргадаг уламжлалт аргаар гаргасан ба сулруулсан вирусийг агуулсан. Одоог хүртэл хүн төрөлхтний хэрэглэдэг, халдварт саа буюу полимиелит, улаан бурхан гээд бидний хүүхэд насандаа тариулсан бүх вакциныг энэ аргаар гаргаж авсан байдаг. Энэ вакцинжуулалт ямарваа нэг асуудал дагуулахгүй, сөрөг нөлөө үзүүлэх ёсгүй гэж эрдэмтдийн зүгээс үзэж байгаа юм.
ОХУ-ын СПУТНИК V вакцин
Спутник V вакцин бол коронавирусийн титэм уургийн генийн материалыг агуулсан, үржих чадваргүй, инженерчилсэн хиймэл вирус. Векторная вирус гэж нэрлэгддэг. Спутник-V вирус хоёр тарилгатай. Үүнд эхлээд Ад5, дараа нь Ад26 технологийг тусад нь тарьж, хүний аденовирус таних, эсэргүүцэх чадварыг дэмжих аргаар дархлаажуулалт бий болгоно гэж үзэж байгаа. Гэхдээ нэг ижил тарилгыг хоёр удаа тарих үед эхний тарилгаар тогтсон дархлаа хоёр дахь тарилгаа эсэргүүцэж, үр дүнгүй болгох эрсдэл өндөр байдаг. Гэвч Спутник V вакцин дараалсан тарилгаараа хоёр өөр векторт хандаж байгаа нь дээрх эрсдэлийг арилгаж, сайн үр дүн үзүүлж байгааг гуравдугаар шатны эмнэлзүйн судалгаагаар батлагдсан гэж танилцуулж байгаа. Нэгэнт коронавирустэй нэлээд хэдэн жил хамт орших тул гурав, дөрөв дэх вакцинжуулалтаар бий болсон аденовирусийн эсрэг биетүүд аденовирусийг өөрийг нь маш хурдан устгах ажиллагаанд орох сул талтай талаар Орос даяар хэлэлцүүлэг өрнөж байна. Дайран дээр давс гэгчээр Спутникийг бүтээсэн институт нь вакцины дархлаа тогтоох чадвар хоёр жил гэж мэдэгдсэн нь маш их дуулиан дагуулж ч байх шиг. Оросууд бэлэн байгаа ганц Спутникээ хоёр тарилгаар хийлгээд цаашид Оросын дараагийн юм уу эсвэл Пфайзер , Модерна хоёр вакциныг оруулж ирэхийг хүлээх нийтлэг ойлголт олон нийтэд сууж байх шиг байна.
Харин Astrazeneca компанийн Оксфордын их сургуулийн эрдэмтэдтэй хамтран хөгжүүлж буй вакцин нь Спутник вакцинтай ижил төстэй векторын вакцин ажээ.
