Хөл хорионы дэглэм сулруулсан эхний өдөр 200 гаруй хүн эрүүлжүүлэгджээ

Нийслэлийн Засаг даргын 2020 оны 12-р сарын 22-ны A/1320 тоот захирамжаар 18-аас дээш градустай архи, согтууруулах ундааг худалдахыг хориглоод байсан билээ. 

Тэгвэл нэгдүгээр сарын 9-ний A/06 тоот захирамжаар өмнөх захирамжийг хүчингүй болгосон байна. Ингэснээр 18-аас дээш градустай архи, согтууруулах ундааг Нийслэлд худалдан борлуулахыг зөвшөөрсөн юм. Дээрх захирамж цуцлагдсан эхний өдөр өмнөх өдрийнхөөс хоёр дахин олон хүн эрүүлжүүлэх байранд хоножээ.  Тодруулбал, 2020 оны нэгдүгээр сарын 10-нд 86 хүн эрүүлжүүлэгдсэн бол, өчигдөр буюу нэгдүгээр сарын 11-нд энэ 225 болсон байна. Мөн Архидан согтуурахтай тэмцэх тухай хууль зөрчсөн 107 дуудлага, мэдээлэл цагдаагийн байгууллагад иржээ. Харин гэр бүлийн хүчирхийллийн дуудлага 92, хулгайлах төрлийн гэмт хэрэг 63, зөрчил 1148 мэдээлэл хүлээж авсан байна.