Газар хөдлөлтөд эрсдэлтэй барилга байгууламжуудын талаар МХЕГ-ын Дэд бүтцийн хяналтын хэлтсийн дарга н.Жаргал мэдээлэл өгөв. Тэрбээр "Улсын хэмжээнд 130 мянган барилга ашиглагдаж байгаа. Жилд 1000-1500 барилга шинээр ашиглалтад ордог.
Нийт барилгын 1970 оноос өмнө буюу газар хөдлөлтийн норм норматив гараагүй байхад баригдсан Улаанбаатар хотын барилга 8.7 хувь, орон нутгийн барилга 17.6 хувийг эзэлж байна. Харин орон нутгийн барилгын 16.6 хувь, Улаанбаатар хотын барилгын 2.1 хувь нь газар хөдлөлтийн тэсвэржилтийн шаардлага хангахгүй гэсэн судалгаа байна. Мэргэжлийн хяналтын байгууллага 2006-2020 оны хооронд 3820 барилгад газар хөдлөлтөд тэсвэргүй гэсэн дүгнэлт гаргасан. Барилгыг буулгах, дахин төлөвлөлтөд оруулах, бэхжүүлэх шаардлагатай дүгнэлтийг албаныханд хүргүүлсэн" гэсэн юм.