Роналду эвдэхэд бэрх хоёр дээд амжилт тогтоолоо

Португалын шигшээ, Италийн “Ювентус” багийн довтлогч Криштиану Роналду Италийн АШТ-ий 17 дугаар тойрогт “Сассуоло” багийн хаалганд гоолдсоноор хөлбөмбөгийн түүхэнд томоор бичигдэх нэг дээд амжилтыг тогтоож, нэг дээд амжилттэй зэрэгцлээ. Тэрээр улсынхаа шигшээ багтайгаа олон улсын тэмцээнд болон  УАШТ-д 759 гоол оруулж Австри, Чехословакийн довтлогч асан Йозеф Бицаны тогтоосон дээд амжилттай зэрэгцсэн байна. Тэдний ард хөлбөмбөгийн хаан домогт Пеле 757 гоол оруулсан амжилтаар бичигддэг ажээ. “Хаан” хэдийгээр 1000 гаруй гоол оруулсан гэдэг ч зарим нь мужийн АШТ-д оруулсан тул тооцогддогүй аж. Гэхдээ энэ үзүүлэлтээр өөр, өөр тоо баримт байдгийг бас дурдах хэрэгтэй. Тухайлбал, Rec.Sport.Soccer Statistics Foundation (RSSSF)-ы гаргасан судалгаагаар Й.Бицан 805, Бразилийн шигшээгийн довтлогч асан Ромарио – 772, Пеле – 767 гоол оруулсан гэж тооцдог байна.

Роналдугийн өчигдрийн гоол энэ улирлын 15 дахь гоол нь байсан. Ингэснээр тэрээр Европын “Топ 5” лигт 15 улирал дараалан 15-аас дээш гоол оруулсан гэсэн эвдэхэд бэрх дээд амжилтын эзэн болсон юм. Тэрээр 2006-2007 оны улиралд дээд амжилт тогтоох эхлэлээ тавьжээ.   


Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд eagle.mn хариуцлага хүлээхгүй.

Сэтгэгдэл бичих (0)