УОК-ын шийдвэрийг танилцуулах үеэр сэтгүүлчийн асуусан иргэд хөдөө орон нутгаас идшээ хэрхэн татах тухай асуултад ХХААХҮ-ийн сайд З.Мэндсайхан “Иргэд идшээ бэлдэх асуудлыг тавьж байгаа. Гэхдээ бэлэн байдал зарласан. Одоо хэсэгчилсэн байдлаар зарим үйлдвэрүүдийг нээж байна. Одоо үүсээд байгаа нөхцөл байдал бол хөл хөдөлгөөнийг хязгаарлах шүү дээ. Тодорхой шийдлүүдийг бид хийж байгаа. Баруун аймгууд хүнс хөдөө аж ахуйн газартай хамтраад аймгаасаа Улаанбаатар хот руу иргэдийн идшийг зохион байгуулалттайгаар хүргэж өгөх тэр машинуудаа эргүүлээд орон нутаг руугаа хүнс, тэжээл зөөх ажлыг хийж байна. Бид Монгол шуудан компанитай хамтраад аймгууд руу 7 хоногт 2 удаа хүргэдэг үйлчилгээгээр дамжуулан орон нутгаас Улаанбаатар хот руу хүргэлтийн үйлчилгээг нэвтрүүлээд 5 хоног болж байна. Нийтдээ 546 захиалга ирэн хүргэлт хийгдэж байна. Энэ үйлчилгээг ашиглаач гэж иргэдээсээ хүсэх байна. Учир нь Монгол шуудан компанийн тээвэрлэлт бүх аймгийн төв дээр хүрч байгаа. Нөгөө талдаа хот руу чиглэсэн мах болон хүнсний тээврийг бид хориглоогүй. Иргэд халдварын дэглэмээ сахин орон нутгаас хүнс тээврийн машинд идэш, хүнсний зүйлээ нэгтгээд дайж Улаанбаатар оруулаач, Монгол шуудан дээр явж байгаа хүргэлтийн үйлчилгээг ашиглаач гэж та бүхнээс хүсэх байна” хэмээн хариуллаа.

Мөн Архангай аймаг руу буцах хүсэлт гарган шинжилгээ өгч байгаа иргэдийн тухай асуудлын хүрээнд Шадар сайд Я.Содбаатар дараах хариултыг өглөө. Тэрээр “Архангай аймгаас 7181 хүн буцъя гэж бүртгүүлсэн. Гэвч тус аймагт халдварын хоёр тохиолдол гарсан тул Архангай аймаг руу явах иргэдийг хойшлуулж байна.

Өчигдөр оройн мэдээгээр 81025 хүн Улаанбаатараас буцахаар бүртгүүлсэн. Орон нутаг руу явах иргэд нэмэгдэж байна. Өнөөдрийн 18.00 цагийн мэдээгээр 91 мянган хүн УБ-аас хөдөө орон нутаг руу буцна гэж бүртгүүлсэн байна. Бид орон нутгийн иргэдээ үе шаттайгаар буцаах ажлыг зохион байгуулна. Эхний ээлжинд цастай, өвөлжилт хүндэрч болох баруун аймгуудын иргэдийг явуулна” гэв.