Орхон аймгийн Онцгой комиссоос мэдээллээ. Тус аймагт коронавируст халдварт өвчний 17 тохиолдол бүртгэгдсэн бөгөөд тэдний дөрөв нь цэцэрлэгийн насны хүүхэд юм. Тиймээс ойрын хавьтлын 297 хүүхдийг гэрийн тусгаарлалтад оруулжээ. Энэ хүүхдүүдийн эхний шинжилгээний хариу сөрөг гарсан байна. Хоёр дахь шинжилгээг PCR-аар хийхээр болжээ.

Орхон аймгийн Онцгой комиссын дэргэдэх эрүүл мэндийн зөвлөх Ц.Мөнхцэцэг: Нийт 17 тохиолдол болох 4-58 насны хүмүүсийг ХӨСҮТ рүү шилжүүлсэн. Тэд шинж тэмдэггүй байх үедээ батлагдаж, одоогоор биеийн байдал хөнгөн байна. 17 тохиолдлын ойрын хавьтлын 409 хүнийг хяналтад бүрэн авсан. Түүний 297 хүүхдийг гэрийн тусгаарлалтад, үлдсэн хүмүүсийг тусгаарлан ажиглах таван байр, ХӨСҮТ-д гээд нийт зургаан байранд ажиглаж байна. Анх хавьтал болсон өдрөөс хойш 13 дахь хоногийг тооцон шинжилгээг дахин авахаар төлөвлөж байгаа бөгөөд хуваарийн дагуу хүүхдүүдийн давтан шинжилгээг маргааш болон нөгөөдөр хийнэ. Мөн хоёр дахь хавьтал болох 380 багшийн шинжилгээг 12 цэгт авна” гэлээ.