Аймаг, нийслэл, сум, дүүргийн ИТХ-ын сонгууль болоод сар гаруйн хугацаа өнгөрч байгаа ч цөөхөн хэдэн аймаг Засаг даргаа томилуулаагүй байна. Тухайлбал, Завхан аймаг ИТХ-ын анхдугаар хуралдаанаа хийгээгүй байгаа бол Увс аймаг Засаг даргаа томилуулаагүй байгаа юм. Аймгийн Засаг даргад нэр дэвшигчийг ИТХ нь тодруулж, Ерөнхий сайд захирамж гарган томилдог. Увс аймгийн ИТХ анхдугаар хуралдаанаа хийж аймгийнхаа Засаг даргад Увс аймгийн АН-ын дарга Ч.Чимэдийг нэр дэвшүүлсэн. Гэвч Ерөнхий сайд түүнийг Засаг даргаар томилох боломжгүй гэдгээ мэдэгдсэн юм. Үүнтэй холбоотойгоор Увс аймгийн ИТХ аймгийн Засаг даргад дахин нэр дэвшүүлэх тухай асуудлыг хэлэлцжээ. Улмаар Ч.Чимэдийг хуралдаанд оролцсон төлөөлөгчдийн 75 хувийн саналаар дэмжиж, түүнийг аймгийн Засаг даргаар томилуулах саналаа дахин Ерөнхий сайдад уламжилжээ.

Бүх нийтийн бэлэн байдлын зэрэгт шилжсэнтэй холбогдуулан Увс аймгийн ИТХ цахимаар хуралдаж дээрх асуудлыг хэлэлцсэн байна.