Коронавируст халдварыг дотооддоо алдаж, улсын хэмжээнд онцгой байдал зарлаад буй билээ. Улмаар онц шаардлагагүй бол гэрээсээ гарахгүй байхыг зөвлөж, шаардлагатай тохиолдолд ариун цэврээ сахихыг холбогдох байгууллагууд анхааруулж буй. Тиймээс амны хаалтыг хэрхэн ариутгах талаар болон зөв хэрэглэх дадлын талаарх зөвлөгөөг хүргэж байна.
Даавуун амны хаалтыг 2-4 цаг зүүсний дараа заавал ариутгах хэрэгтэй аж. Гэхдээ амны хаалтыг спиртийн төрлийн ариутгагчаар цэвэрлэхийг мэргэжлийн эмч нар сайшаадаггүй учир гэрийн нөхцөлд ариутгахдаа бактерийн эсрэг савангаар 2-3 удаа савандаж угаасан нь зүй. Угааж, цэвэрлэсний дараа хуурай болтол нь индүүдснээр бактери гүйцэт устдаг. Түүнчлэн амны хаалтыг чийгтэй зүүвэл бактери үржих таатай нөхцөл бүрдэнэ. Гэхдээ даавуун материалтай амны хаалтын вирусээс хамгаалах чадвар нь шүүлтүүртэй төрлийнхийг гүйцэхгүй аж.
Хэрэглэсэн амны хаалтыг хаях дараалал
✓ Амны хаалтыг хаяхдаа бохирдолтой хэсгээс барьж, боож, нугалж болохгүй.
✓ Амны хаалтыг зүүхээсээ өмнө гараа заавал угаах эсвэл халдваргүйжүүлэлтийн бодисоор ариутгах хэрэгтэй.
✓ Амны хаалтын хамгийн эрсдэл багатай буюу бохирдоогүй хэсэг бол чихний арын хэсгийн зүүлт юм. Тиймээс чихний арын хэсгээс барьж тайлан, ойр байгаа хогийн саванд нугалалгүйгээр шууд хаяна.
✓ Хэрэв ойр хавьд хогийн сав байхгүй тохиолдолд мөн чихний арын бохирдол бага хэсгээс тайлж, эвхэж нугалалгүйгээр гялгар уутанд хийж хаях.
✓ Нэг удаагийн амны хаалтыг хоёр цагаас дээш хугацаагаар хэрэглэхгүй байх.
✓ Маск зүүж байх хугацаандаа гараараа хүрэхгүй байх.
✓ Шинэ төрлийн коронавирус чийгтэй орчинд түргэн үрждэг тул амны хаалтыг норсон даруйд нь солих хэрэгтэй.
