Оймсондоо мөнгө нуусан дарга нарт холбогдох хэргийн шүүх хурал хойшиллоо

Оймсондоо мөнгө нуусан дарга нарт холбогдох эрүүгийн хэргийн шүүх хуралдаан хойшиллоо. Тодруулбал, МХЕГ-ын Экспорт, импорт, хилийн хорио цээрийн хяналтын хэлтсийн дарга асан Н.Баярсайхан, тус газрын Экспорт, импорт, хилийн хорио цээрийн хяналтын газрын дарга Э.Аззаяа нарын зургаан хүнд холбогдох хэргийн шүүх хурлыг есдүгээр сарын 14-нд товлосон юм. Гэвч шүүгдэгч Э.Аззаяагийн өмгөөлөгч Ц.Дэлгэрням нь шүүх хуралдаан давхардсан тул шүүх хуралдааныг хойшлуулах хүсэлт ирүүлсэн, шүүгдэгч Д.Төмөрбаатарт тов мэдэгдсэн боловч хүндэтгэн үзэх шалтгаангүйгээр ирээгүй байна.

Тиймээс шүүх хуралдааныг хойшлуулж энэ сарын сарын 21-ний өдрийн 09.30 цагт товлосон байна. Улмаар шүүгдэгч Д.Төмөрбаатар нь хүндэтгэн үзэх шалтгаангүйгээр шүүх хуралдаанд ирээгүй тул цагдан хорих таслан сэргийлэх арга хэмжээ авчээ. Харин дараагийн шүүх хуралдаан хүртэл Н.Баярсайхан, Э.Аззаяа нарт авсан Монгол Улсын хилээр гарахыг хязгаарлах хязгаарлалт тогтоох, С.Бүрэнтөгс, Г.Элдэв-Очир, Ж.Тэгвандан нарт авсан хувийн баталгаа гаргах таслан сэргийлэх арга хэмжээг тус тус хэвээр үргэлжлүүлж шийдвэрлэлээ.

Нийслэлийн Прокурорын газраас шүүгдэгч МХЕГ-ын Экспорт, импорт, хилийн хорио цээрийн хяналтын хэлтсийн дарга асан Н.Баярсайхан, тус газрын Экспорт, импорт, хилийн хорио цээрийн хяналтын газрын дарга Э.Аззаяа нарыг хахууль авсан хэргээр яллах дүгнэлт үйлдэж, шүүхэд шилжүүлсэн юм.

Сэтгэгдэл бичих