Германы Кельн хотод байдаг “Pascha” хэмээх эмсийн хүрээлэн дампуурчээ. Корона вирусийн шалтгаант цар тахлаас болж ийнхүү дампуурсан байна. Төвийн дарга Армин Лобшайд “Санаанд багтахгүй юм. Гэхдээ би дампуурах тухай шийдвэрээ мягмар гаригт орон нутгийн шүүхэд өглөө” хэмээн хэвлэлд ярьсан байна. Хэрвээ эрх баригчид татварын бага ч гэсэн хөнгөлөлт үзүүлсэн бол ийм шийдвэр гарахгүй байсан гэдгийг тэрээр онцолжээ.
“Pascha” төвийн 11 давхар бүхий барилгад 120 биеэ үнэлэгч ажиллаж, улсад татвар төлдөг байжээ. Тус улсын 400 гаруй биеэ үнэлэгч өнгөрсөн долоодугаар сард уулзаж, ажлын байраа нээлгүүлэх талаар ярилцан, хүсэлт гаргасан ч эрх баригчид зөвшөөрөөгүй аж.