УИХ-ын чуулганы нэгдсэн хуралдаанаар Засгийн газрын бүтэц батлах тухай асуудлыг хэлэлцэж байна. Ерөнхий сайдын оруулж ирсэн Засгийн газрын бүтэцтэй холбогдуулан гишүүд асуулт асууж хариулт авч байна. Ерөнхий сайд У.Хүрэлсүх С.Ганбаатар гишүүний асуултад хариулахдаа "Уул уурхайн баялгийг ашиглаж хууль бусаар баяжсан нөхөдтэй хариуцлага тооцож ажиллаж байгаа. Цаашид энэ асуудал дээр улам хатуу байна. Байгалийн баялаг бол Монголын ард түмний баялаг болохоос биш хэдхэн хүний баялаг биш. Байгалийн баялгийг ард түмэн тэнцүү хүртэх ёстой гэсэн зарчимтай хүн би. Энэ зарчмаа цаашид ч баримтална. Улс төр, хууль хүчнийхний нийлсэн бүлэглэл бий. Энэ хүмүүстэй тэмцэнэ. Шалгах хүн олон бий. Засгийн газар бол гэмт хэрэгтэй тэмцэх субъект. Цаашид гэмт хэрэгтэй тэмцэнэ гэж бодож байгаа. Шалгах ёстой хүмүүсээ шалгана. Шалгалт цаашаа үргэлжилнэ. Энэ ажлын хүрээнд алдагдсан уурхайнуудыг буцааж авах ажлыг хийж байгаа. Эхнээсээ үр дүнд хүрч байгаа" гэлээ.
