УИХ-ын чуулганы нэгдсэн хуралдаанаар Засгийн газрын бүтэц батлах тухай асуудлыг хэлэлцэж байна. Гишүүд Ерөнхий сайдын оруулж ирсэн Засгийн газрын бүтэцтэй холбогдуулан гишүүд асуулт асууж хариулт авч байна.
Л.Энх-Амгалан: -Засгийн газрын бүтцээ тодорхойлохдоо тогтвортой байдал, залгамж чанар, түүхэн уламжлал, хөгжлийн чиг хандлага гэсэн дөрвөн зарчим баримталсан юм байна. Үндсэн хуульдаа хөгжлийн бодлого төлөвлөлт тогтвортой байна гэж заасан. Мөн Хөгжлийн бодлого төлөвлөлт, түүний удирдлагын тухай хуулийг УИХ өнгөрсөн хаврын чуулганаараа баталсан. Уг хуульдаа Эдийн засгийн хөгжлийн яамтай байна гэсэн заалт оруулсан. Гэтэл Засгийн газрын бүтцэд энэ яамыг оруулж ирсэнгүй. Ерөнхийлөгч өгсөн саналдаа "Тусдаа яам байгуулахгүй бол эдийн засгийн бодлого, төлөвлөлтийн асуудлыг Шадар сайдын хариуцах асуудлын хүрээнд оруулах ёстой" гэсэн санал өгсөн байна. Ерөнхийлөгчийн санал бол зөв гэж үзэж байна.
Хоёрдугаарт, чөлөөт бүсүүдийг Шадар сайдын хариуцах асуудлын хүрээнд оруулсан хэрнээ, хилийн боомтуудыг нь Сангийн сайдын хариуцах асуудлын хүрээнд багтаасан байна. Үүнийг хамтад нь Шадар сайддаа хариуцуулж болдоггүй юм уу?
ЗГХЭГ-ын тэргүүн дэд дарга Б.Ганбат: -Өнөөгийн эдийн засгийн нөхцөл байдлаа тооцоолоод шинээр яам байгуулах нь зардал нэмэгдэхээс эхлээд сөрөг үр дагавартай гэж үзсэн. Мөн холбогдох хууль тогтоомжуудад нь өөрчлөлт оруулахаас эхлээд олон ажил хийх шаардлагатай учраас хугацааны хувьд Эдийн засгийн хөгжлийн яамыг байгуулах шаардлагагүй гэж үзсэн. Хөгжлийн төлөвлөлттэй холбоотой асуудлыг Үндэсний хөгжлийн газар хариуцан ажиллаж байгаа. Өөрөөр хэлбэл, хөгжлийн бодлого төлөвлөлттэй холбоотой асуудлыг өнөөдрийнхөө зохион байгуулж ажиллах боломжтой гэж үзсэн.
Хилийн боомт, чөлөөт бүстэй холбоотой асуудлыг яг одоогийнхоор нь оруулж ирсэн. Хилийн тухай хуулиар Хилийн боомтын зөвлөл гэж байдаг. Энэ зөвлөлийг нь Сангийн сайд ахалж ажилладаг. Тиймээс бид одоо хүчин төгөлдөр байгаа хуулийн зохицуулалтыг хэвээр нь оруулж ирсэн. Ямар нэгэн өөрчлөлт оруулаагүй гэсэн үг.
Л.Энх-Амгалан: -Бид алдаагаа засаж явах ёстой. Энэ хоёр тус тусдаа байгаад гайхаж байна. Дараагийн хэлэлцүүлгийн үеэр зарчмын зөрүүтэй санал гаргах бодолтой байна.
У.Хүрэлсүх: -Иргэд маань сонголтоороо тогтвортой байдлыг хүссэн. Нэг яамыг татан буулгаж, шинээ байгуулаад сандал, ширээ зөөгөөд байхгүйгээр улс орноо эмх цэгцтэй аваад яв гэж ард түмэн маань сонголтоо хийсэн. Тиймээс Ерөнхий сайдын хувьд Засгийн газрын бүтэц нь тогтвортой байж, ажил хариуцсан хүмүүс нь ажлаа үргэлжлүүлэн хариуцаад явах нь зүйтэй гэж үзэж байгаа. Эдийн засгийн хөгжлийн яам хэрэгтэй юү гэвэл хэрэгтэй. Тиймээс хууль хэрэгжүүлж яам байгуулах хугацааг нь хойшлуулсан. Эдийн засгийн бодлого, төлөвлөлтийн асуудлыг ЗГХЭГ-ын дарга хариуцна. Ер нь аль болохоор л хөдөлгөөн багатай байлгая гэж үзэж байгаа.
