Арваад жил зогсонги байдалтай байсан 300 ортой төрөх эмнэлгийн барилгын ажлыг 2018 оны тавдугаар сараас эхлүүлж, 2020 оны долоодугаар сард "Нийслэлийн эх, хүүхдийн эмнэлэг" нэртэйгээр ашиглалтад оруулж хүлээлгэн өглөө.
Нийслэлийн хэмжээнд эх, хүүхдийн төрөлжсөн тусламж, үйлчилгээг үзүүлэх хүчин чадалтай энэ эмнэлэг нь эх барих, эмэгтэйчүүдийн тусламж үйлчилгээний 160 ор, хүүхдийн тусламж үйлчилгээний 140 ор бүхий үндсэн долоон блок, найман давхартай.
Мөн Дэлхийн банкны санхүүжилтээр 205 нэр төрлийн арван багц 3580 ширхэг, нийт 17 тэрбум орчим төгрөгийн тоног төхөөрөмж, эд хогшил нийлүүлнэ. Цар тахал болон томуу, томуу төст өвчний дэгдэлтийн үед дэлгэн ажиллуулах 1000-1500 орны нөөцтэй. Эмнэлэг нийтдээ 681 эмч, ажилтан бүхий 12 алба, эмчилгээ үйлчилгээний 22 тасагтайгаар ажиллах юм.
Монгол Улсын Ерөнхий сайд У.Хүрэлсүх: Монгол улсад 30 гаруй жилийн дараа эх нялхсын хоёр дахь том эмнэлэг ашиглалтад орж байна. 2010 онд суурийг нь тавьснаас хойш хөрөнгө мөнгөгүйн улмаас зогссон барилгын ажлыг 2018 онд Засгийн газар санхүүжилтыг бүрэн олгож Эх нялхсын төвийг ашиглалтад оруулахаар зорьж ажилласан. Сэтгэл байвал аливаа зүйл бүтдэг юм байна гэдгийг харж байна. Нийтдээ 39 тэрбум төгрөгийн хөрөнгө оруулалттай барилгыг тоног төхөөрөмжийн хамт шийдсэн.
Эрүүл мэндийн сайд Д.Сарангэрэл: Зөвхөн эхийг төрүүлдэг, нялхсыг эмчилдэг эмнэлэг биш эмнэлгийн цогц тусламж үйлчилгээ үзүүлнэ гэдгээр шинэ эмнэлэг онцлог болж байна. Ялангуяа нялхсын эрт үеийн эмгэгийг илрүүлэх, эмэгтэйчүүдийн үргүйдэл, нөхөн үржихүй, цэвэршилтийн асуудал гээд цогц эмнэлгийн тусламж үзүүлдэг олон улсын стандартад нийцсэн төвийг бид хүлээн авлаа.
Нийслэлийн Хүрээ амаржих газрын дарга А.Жаргал: Тусламж үйлчилгээндээ хүүхдийн ерөнхий мэс засал тэр дундаа эрүү нүүр, нүд, чих хамар хоолойн мэс засал мөн амьсгалын замын эрхтний эмгэгийн тасгууд, хоол боловсруулах эрхтэн, зүрх судасны эмгэгийн тасаг гэх мэтчилэн төрөлжсөн мэргэжлийн тасгуудыг үе шаттайгаар хөгжүүлнэ. Хүний нөөцийг бэлтгэж эхлээд байгаа. 2020 ондоо зөвхөн эх барих эмэгтэйчүүдийн чиглэлээр тусламж үйлчилгээг үзүүлнэ.
Хүрээ амаржих газарт жилдээ 5000-6000 эхийг эсэн мэнд амаржуулж, нярайн тусламж үйлчилгээ үзүүлдэг байсан бол "Нийслэлийн эх хүүхдийн эмнэлэг"-т 10 000-12 000 хүртэл эхийг амаржуулж жилд дунджаар таваас зургаан мянган хүүхдийг хэвтүүлэн эмчилэх юм.
