Эрүүл мэндийн яам, ХӨСҮТ болон бусад холбогдох албаныхан COVID-19-ын халдвартай холбоотой үүсээд байгаа нөхцөл байдлын талаар мэдээлэл хийж байна.
ЭМЯ-ны хэлтсийн дарга Д.Нарангэрэл "Дэлхийн 216 улсад коронавирусийн өвчлөл бүртгэгдэж, 10.2 сая хүн өвчилж, 503 мянга гаруй хүн нас баржээ. Одоогоор 5.5 сая хүн эдгэрч эмнэлгээс гарсан бол 4.1 сая хүн эмнэлэгт хэвтэн эмчлэгдэж байна.
Сүүлийн 24 цагт дэлхий дахинд 153 мянган хүн шинээр COVID-19 халдвар авч, 3000 гаруй хүн нас баржээ.
24 цагийн хугацаанд АНУ-д 44 мянга шинэ тохиолдол бүртгэгдсэн нь цар тахал гарснаас хойш тус улсад бүртгэгдсэн хамгийн өндөр тохиолдлын тоотой өдөр байлаа. Мөн Бразилд 30, Энэтхэгт 19 мянгаар өвчлөл нэмэгдсэн. Энэтхэгт сүүлийн 4 өдөр дараалан өвчлөл тогтвортой нэмэгдэж байна. Тиймээс Энэтхэгийн Засгийн газраас зөвхөн коронавирусийн халдвар авсан иргэдийг эмчлэх, 10 мянган хүн хэвтэн эмчлүүлэх хүчин чадалтай эмнэлэг шинээр нээжээ.
Зүүн Европын 30 оронд хөл хорио сулруулсантай холбоотойгоор өвчлөл дахин нэмэгдсэн. Тиймээс 11 орон хөл хорионы дэглэмээ эргэн чангатгажээ.
ОХУ-д сүүлийн 24 цагт 6791 хүн шинээр халдвар авч, 104 хүн нас барсан. Манай хил залгаа бүс нутгуудад өвчлөл 26-124 тохиолдлоор нэмэгдэж, өвчлөл тасралтгүй хурдтай нэмэгдэж байна. Эрхүүд 232 хүн шинээр халдвар авчээ.
Манай улсын хувьд өчигдөр 87 хүн ажиглалтад шинээр орж, 16 хүн ажиглах байраас гэрийн тусгаарлалт руу шилжин, одоогийн байдлаар 2710 хүн тусгаарлан ажиглах байранд байна. Ажиглах байранд байгаа иргэдэд 42 их эмч 74 резидент эмч эмнэлгийн тусламж үйлчилгээ үзүүлж байна.
Үүргийн онгоцоор ирсэн 78 хүн Цэргийн төв эмнэлэгт хэвтэн тусламж үйлчилгээ авч байна. Үүнээс 51 хүн архаг хууч өвчтэй, 5 хүний биеийн байдал хүнд эрчимт эмчилгээнд байна.
24 цагт 119 дугаарт 159 дуудлага ирж, коронавирусийн халдвараас урьдчилан сэргийлэх, эмнэл зүйн шинж тэмдгийн талаар зөвлөмж, зөвлөгөөг авсан. Гадаадаас шуурхай 119 апп-д гадаадаас Казахстан БНСУ-аас 2 иргэн холбогдож зөвлөгөө, мэдээлэл авсан. Иргэд гадуур амны хаалтгүй их явж байна, үйлчилгээний газруудын худалдагч нар амны хаалт зүүхгүй анхаарал суларч байгааг анхааруулсан” гэв.
