Б.Энхжаргал: “Бурхны авралаар, чи ирлээ!” шоу нь жүжиглэх чадвар шалгах зорилгогүй

Боловсрол телевизийн уран бүтээлчид “Бурхны авралаар, чи ирлээ!” шоу нэвтрүүлгээ үзэгчдэд толилуулаад багагүй хугацаа өнгөрлөө. Олны танил хүмүүсийг хүндхэн агаад хөгжилтэй нөхцөлд оруулдаг тус контентын ерөнхий продюсер Б.Энхжаргалтай шоуны тухай дэлгэрэнгүй ярилцлаа.

-“Бурхны авралаар, чи ирлээ!” шоу нэвтрүүлгийн үндсэн дүрэм нь үзэгчдийг гайхшируулсан. Тиймээс нэвтрүүлгийн дүрмийн талаарх танилцуулгаар яриагаа эхэлье?

-“Бурхны авралаар, чи ирлээ!” нэвтрүүлэг нь бэлдээгүй хошигнол төрөлд багтдаг. Бэлдээгүй хошигнол гэдэг нь оролцогчид ямар ч бэлтгэлгүйгээр тайзан дээр гарч, өгөгдсөн нөхцөлийг өөрсдийн уран сэтгэмжээр хувирган хөгжилдөх инээдмийн нэгэн төрөл юм. Нэвтрүүлгийн дүрмийн хувьд, дугаар тус бүрд гурван олны танил эрхэм оролцон нэг, нэг үзүүлбэрт тоглож, дараа нь хамтарсан үзүүлбэрийг үзүүлдэг. Ингээд нэг оролцогч ялагчаар тодордог юм.

-Оролцогчдод өөрсдийнх нь тоглох үзүүлбэртэй холбоотой ямар ч мэдээлэл өгдөггүй гэсэн үг үү?

-Тийм ээ, бид оролцогчдод үзүүлбэртэй холбоотой ямар ч мэдээлэл өгдөггүй. Энэ нь шоуны маань амин зүрх юм. Хүмүүс бид таамаглаагүй, гэнэтийн нөхцөл байдалд дахин давтагдашгүй үг хэллэг, үйл хөдлөл, зан араншинг гаргаж байдаг шүү дээ. Тэгэхээр энэ дахин давтагдашгүй байдал нь нэвтрүүлгийн шигтгээ болно гэсэн үг.  Контентыг олон улсын стандартын дагуу үндсэн форматаар хийж байгаа учир бидэнд мэдээлэл өгөх эрх байхгүй. Өөрөөр хэлбэл, бид оролцогчдынхоо анхны сэтгэгдлийг үзэгчдэд шууд дамжуулахыг зорьж ажилладаг. Ингэж байж жинхэнэ шоу болно.

-Тэгэхээр нэвтрүүлэгт дубльдэх (дахиж бичих) гэсэн ойлголт байхгүй гэж ойлгож болох уу? 

- Тэгэлгүй яах вэ, дубльдэх юм бол нэвтрүүлэг ямар ч “амтгүй” болно. Тиймээс нэвтрүүлгээ бүтээхдээ шууд бичлэг шиг л бичиж байгаа.

-“Бурхны авралаар, чи ирлээ!” шоу шиг “бэлдээгүй хошигнол” төрлийн контентыг бүтээж байсан туршлага бий юу?

- Манай телевизийн хувьд, инээдмийн төрлийн “3 сая инээд” шоу нэвтрүүлгийг бүтээж, үзэгчдэдээ хүргэсэн. Энэ шоу нэвтрүүлэг нь стэнд-ап, онигоо, шог үзүүлбэр, элэглэл, илбэ гээд хошин урлагийн олон төрлийг өөртөө нэгтгэж чадсан ч бэлдээгүй хошигнол төрлийн үзүүлбэр хараахан багтаагүй байсан юм. Ер нь энэ төрлийн контент манай телевиз гэлтгүй Монголын Улсын хошин урлаг болон телевизийн салбарт шинэлэг төрөл болж байна.

-Хэдэн улсад бүтээж, туршсан нэвтрүүлэг вэ?

- “Бурхны авралаар, чи ирлээ!” шоу нэвтрүүлгийг хамгийн анх 2006 онд Австрали Улсын “Working dog” студийн уран бүтээлчид бүтээж байсан. Манай телевиз албан ёсны эрхийг худалдаж авахад дэлхийн 25 улс бүтээчихсэн байсан. Хамгийн амжилттай болсон хувилбар нь Орос Улсын хувилбар. Тэд уг нэвтрүүлгийн 11 улирлыг хийгээд байна. Тиймээс ч бид Оросын хувилбарыг илүү ихээр судалж, суралцсан. Түүнчлэн монгол хүний соёл, сэтгэлгээний онцлогт тохируулан бүтээх нь чухал учраас зохиол бүрдээ үүнийг анхаарч ажилласан.

-Оролцогчдод үзүүлбэрийн 10 гаруй минутын хугацаа тун удаан өнгөрөх шиг санагддаг гэсэн. Энэ хүндхэн хийгээд хөгжилтэй хормыг давах оролцогчид нэвтрүүлгийн саналыг хэрхэн хүлээн авч байсан бол?

- Тайзан дээр ямар үйл явдал өрнөхийг огт мэдэхгүйгээр зураг авалтад оролцох нь жүжигчин мэргэжилтэй хүнд ч, мэргэжлийн бус хүнд ч том сорил. Гэхдээ оролцогчид өөрсдийгөө туршиж, урьд өмнө нь мэдэрч байгаагүй сонирхолтой мэдрэмжийг авах болно. Тиймээс нэвтрүүлэгт оролцох урилгыг таатай хүлээн авсан. Гэхдээ бүгд л айдастай байна гэж байсан шүү.

-Тэд нэвтрүүлэгт оролцсоныхоо дараа ямар сэтгэгдэл хэлдэг бол?

10 минутын хугацаанд тархиа бүрэн ажиллуулж, бүхий л чадлаараа жүжиглэснээ хэлээд тун сонин, содон мэдрэмжийг авч, сэтгэл ханамжтай байснаа илэрхийлж байсан. Бас бүгд л СУИС-д шалгалт өгсөн юм шиг санагдаж байна гэдэг дээ.

-Энэ нэвтрүүлэг нь оролцогчдын уран сэтгэмжийг шалгахаас гадна үндсэн жүжигчдийг ч чамгүй сорьдог. Үндсэн жүжигчдийн багийг хэрхэн бүрдүүлсэн бэ?

-Нэвтрүүлгийн маань бас нэгэн чухал хэсэг бол телевизийн уран бүтээлчдийн зүгээс сонгож бэлдсэн үндсэн жүжигчид юм. Бид нийт 10 дугаарын 40 зохиол бэлтгэсэн. Эдгээр зохиолд гарах дүрүүдийг судлаад онцлогт нь тохирох жүжигчдээ сонгосон юм. Хэдийгээр бид үзүүлбэр тус бүрд олон хувилбарт зохиолыг гаргаж байгаа боловч тайзан дээр өрнөх үйл явдлыг тааварлах боломжгүй. Зочин оролцогч нөхцөл байдлыг яаж ч эргүүлж, өөрчилж болзошгүй. Тиймээс бидэнд туршлагатай, сэтгэн бодох чадамж сайтай, чадварлаг жүжигчид шаардлагатай болсон. Ийм шалгууруудын дагуу шилдэг жүжигчдээр багаа бүрдүүлж чадсан юм.

-Дугаарын ялагчийн талаарх үзэгчдийн сэтгэгдэл харилцан адилгүй байгаа нь цахим орчин дахь сэтгэгдлээс анзаарагдсан. Шүүгчид ялагчийг тодруулахдаа ямар нэг шалгуур үзүүлэлтийн дагуу шүүж байгаа юу?

-Үзэгчид хэн нь илүү сайн жүжиглэж байгаагаар өөрсдийн шүүлтийг хийж байгаа нь анзаарагдсан. Гэхдээ манай нэвтрүүлэг жүжиглэх чадварыг 100 хувь шалгах шоу биш юм шүү. “Бурхны авралаар, чи ирлээ!” нэвтрүүлэг инээдмийн төрлийн контент. Тиймээс сайн жүжиглэхээс илүү инээдтэй байх нь хамгийн чухал. Шүүгчдийн зүгээс оролцогчдын гаргаж буй хариу үйлдэл, уран сэтгэмж, хөгжилтэй байдал гэсэн гурван шалгуур үзүүлэлтэд үнэлэлт өгөөд ялагчийг тодруулж байгаа.

- Нэвтрүүлгийн турш бага хугацаанд олон тайз хийж байна лээ. Энэ тухай яривал?

- Шоу маань тайз, дэлгэцийн хосолмол бүтээл болж буйгаараа онцлогтой. Тэр ч утгаар монголдоо шинэлэгт тооцогдож байна. Тайзан дээрх үзүүлбэрийг дэлгэцээр үзүүлж байгаа учраас бодит орчныг бүрдүүлж, мэдрүүлэхэд ихээхэн анхаарч ажиллаж байгаа. 30 орчим зураач тусгайлан зассан студид үзүүлбэр бүрд зориулан тайз засаж, чимэглэдэг юм.

- Энэ контентоор дамжуулан үзэгчдэд ямар мэдрэмж өгөхийг хүссэн бэ?

-Дэлхий нийтээр даван туулж буй энэ хүнд цагт үзэгчдэдээ бага ч гэсэн инээд хөөр бэлэглэж, технологийн тусламжтайгаар хүн бүр эерэг цэнэгээр цэнэглэгдээсэй гэж хүссэн. Нэвтрүүлэг нийт 10 дугаартай. Энгийн найман дугаараас нэг, нэг ялагч тодорно. Эдгээр найман ялагч маань дөрөв дөрвөөрөө хуваагдан сүүлийн хоёр дугаарт өрсөлдөж мөн нэг, нэг ялагч тодрох юм.

Финалын дугаар 6-р сарын 28, 7-р сарын 5-нд шууд дамжуулалтаар үзэгчдэд хүрнэ. Энэ үеэр үзэгчид өөрийн дэмжиж буй оролцогчдодоо саналаа өгч, ялагч болоход нь хувь нэмрээ оруулах боломжтой.

-Баярлалаа, та бүхэнд ажлын амжилт хүсье.

-Баярлалаа.


Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд eagle.mn хариуцлага хүлээхгүй.

Сэтгэгдэл бичих (0)