Эрүүл мэндийн яамнаас CoVid19 халдварын тархалтын нөхцөл байдлын байдлаар мэдээлэл хийлээ. Энэ үеэр ХӨСҮТ-ийн захирал Д.Нямхүү “Өнөөдөр үдээс хойш гарсан шинжилгээний хариугаар 37 шинэ тохиолдол нэмэгдлээ. Ингээд ОХУ-аас өчигдөр ирсэн оюутнуудын 55 нь коронавирусийн халдвартай нь тогтоогдлоо. Монгол Улсад бүртгэгдсэн нийт тохиолдлын тоо 98 болов. Одоогоор халдвар авсан иргэдийн 15 нь эдгэрсэн бөгөөд ХӨСҮТ-д 83 иргэн эмчлүүлж байна" гэсэн юм.
Ийнхүү ОХУ-аас өчигдөр ирсэн 347 сонсогчийн 55-аас нь коронавирусийн халдвар илрэв. Харин Турк улсаас тусгай үүргийн онгоцоор өнөөдөр ирсэн 170 гаруй иргэний шинжилгээний хариу маргааш гарах юм.
Тусгай үүргийн онгоцоор ирж буй иргэдийг нэг нэгээр нь тусгаарлах, эмчлэх байрыг бүрэн бэлтгэжээ. Мөн эмчилгээнд зориулсан эм, тариа, хувийн хамгаалах хэрэгсэл хангалттай байгааг ХӨСҮТ-ийн захирал Д.Нямхүү хэлэв. Тэрээр "Хүний сэтгэл санаа гэдэг хамгийн чухал. Сэтгэл санаагаар унах нь эмчилгээний үр дүнд нөлөөтэй. Тиймээс энэ хүүхдүүдээ сэтгэл санаагаар дэмжих нь эмчилгээнд оруулж буй хувь нэмэр юм шүү. Гаднын улс орнууд өөрийн иргэдийг яах вэ гэж байгаа учраас гадаадын иргэдийг төвөгшөөж байгаа нь үнэн. Гадаадын иргэдийг өөрийн улс орон руу явахыг зөвлөж байгаа юм билээ. Тиймээс бид хүнд нөхцөлд байгаа иргэдээ авчрахаас өөр аргагүй. Манайхан бүх бэлтгэлээ хийсэн. Иргэдээ эмчлээд эдгээнэ гэсэн бүрэн итгэлтэй ажиллаж байгаа" гэв.
