Улаанбаатарын хүмүүс: Автобусны жолоочоор 10 жил ажиллахдаа анх удаа Цагаан сараар бүтэн амарч үзлээ

“Эрдэм транс” компанийн автобусны жолооч Т.Ариунболд

Би чинь коллежийг сүлжигчээр төгссөн. Тэр мэргэжлээрээ хоёр жил Ээрмэлийн үйлдвэрт нэхмэлчин байлаа. Тухайн үед ажил ховор байсан учраас хамаатны ах “Чи жолооч юм чинь автобусны жолооч авна гэж байна” гэж анх санал болгоход нь зөвшөөрч байлаа. Өмнө нь том тэрэг барьж байсан болохоор гайгүй байсан шүү. Нийтийн тээврийн жолоочоор 10 жил тасралтгүй ажиллаж байна.

2010 онд анх нийтийн тээврийн жолооч болж байхад одоогийнх шиг түгжрэл гэж байсангүй. Хуучин кондуктортой ажиллаж байхад л жолооч болж байлаа. Харин шинэ систем рүү шилжин картаар үйлчлүүлж кондуктор ажилладаггүй болсноор жолооч нарт ачаалал нэмэгдсэн шүү. Одоогоор коронавирус улмаас хөл хорио тогтоон хязгаарлалтууд хийж байгаа болохоор нийтийн тээврээр зорчих хүн багатай гайгүй байна. Ачаалалтай үед хүмүүс урдаа бөөгнөрөн заалны хойд хэсэг сул, тэр бүрд шаардлага тавихаар хүлээж авахгүй хүндрэлүүд бий. Гэхдээ нийтийн тээврээр янз бүрийн л хүмүүс үйлчлүүлнэ. Зарим нь уур уцаартай байхад ажил төрөл нь бүтсэн инээгээд орж ирэх нэгэн ч байна.

Автобус гэдэг чинь унаж явахад сайхан унаа шүү. 2010 онд эргэлт буюу “РЕС” цаг гэж хийдэг. Тэр үед өдөрт 7 эргэлт хийх бол түүнийгээ л явдаг байлаа. Харин 2014 оноос хойш түгжрэл ихтэй үед болсон учраас өдөрт явах 7 эргэлтээсээ 5.5, зургааг арай гэж л хийдэг болсон.

Автобусны жолоочоор 10 жил ажиллахдаа анх удаа энэ жилийн цагаан сараар хөл хорио тогтоон нийтийн тээврийнхэн бүгд бүтэн амарч үзсэн шүү. Өмнө нь цагаан сарын аль нэг өдөр заавал л ажилтай таардаг байсан. Ямар ч баяр ёслолоор амрахгүй л ажилладаг.

---