World Press Photo 2020: Суданы жагсагчдын зураг шилдгээр нэрлэгдэв

2019 оны зургаадугаар сард Суданд болсон эсэргүүцлийн үеэр авсан зургийг "Хэвлэлийн шилдэг гэрэл зураг"-аар нэрлэжээ. Энэ тухай пүрэв гаригт тэмцээнийг зохион байгуулагчид мэдэгдэв. World Press Photo бол 1955 оноос хойш зохион байгуулагдаж буй олон улсын хамгийн нэр хүндтэй тэмцээн юм. Энэ жил шүүгчид 125 орны 4300 гэрэл зурагчны 74 мянган зургаас сонголтоо хийжээ.

"Хэлэх үг" гэрэл зурагт гар утасны гэрэлтүүлгийн дор улс орондоо иргэний засаглал тогтоохыг уриалж буй залууг дүрсэлсэн байна. Энэ зургийг 2019 оны 6-р сарын 19-ний өдөр France Presse агентлагийн зурагчин Ясуёши Чиба авчээ.

Өнгөрсөн оны дөрөвдүгээр сард Суданд цэргийн эргэлт болж 30 жилийн турш засагласан Ерөнхийлөгч Омар аль-Баширын дэглэмийг түлхэн унагаасан юм. Үүний дараа засгийн эрхийг иргэний засгийн газарт шилжүүлэхийг шаардсан эсэргүүцлийн давалгаа орон даяар өрнөв. Удаан хугацааны яриа хэлэлцээний үр дүнд арми болон иргэний улс төрийн хүчин хоорондын эрх мэдлийг шилжилтийн хугацаанд хуваах талаар тохиролцоонд хүрсэн билээ. Энэ үйл явц 2022 оны эцэс хүртэл үргэлжилнэ.

Удаах байрт шалгарсан гэрэл зургуудаас хүргэе.

2019 оны 3-р сарын 10-ны өдөр Этиопын агаарын тээврийн ET302 нислэг Аддис-Абебагаас хөөрсний дараа осолдож, 157 хүн амиа алдлаа (Mulugeta Ayene)

 

Хоёрдугаар сард Алжирт өрнөсөн Засгийн газрын эсрэг жагсаал (Farouk Batiche)

 

Гэрэл зурагт дүрвэгсдийн лагерьт хүнд өвчин туссан 15 настай армен охин Эваг дүрсэлжээ. Resignation Syndrome хэмээх өвчний улмаас хүн огт хөдөлгөөнгүй, хэл яриа, ууж идэх чадваргүй болж, бие махбодийн өдөөлтөд хариу өгөх боломжгүй болно. Энэ өвчнөөр удаан хугацааны туршид дүрвэгсдийн лагерьт хүнд нөхцөлд амьдарч буй хүүхдүүд илүүтэй өвдөж байна. Эвагийн гэр бүл Швед цагаачлах орогнол хүссэн ч зөвшөөрөөгүй тул Польш руу албадан гаргав. Найман сарын дараа Эва эдгэрчээ

(Tomek Kaczor)

Шархадсан курд дайчин. Сирийн Ардчилсан хүчний байлдагч 18 настай Ахмед Ибрахим Туркийн цэргийн ажиллагааны үеэр шархдаж түлэгджээ. Найз бүсгүй нь түүний царайг харахыг хүсэхгүй байсан ч эмч сувилагч нар удаан гуйж ятгасны эцэст  Ибрахимийг эргэн очиж гараас нь атган ярилцав (Ivor Prickett)


Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд eagle.mn хариуцлага хүлээхгүй.

Сэтгэгдэл бичих (0)