УИХ-ын дарга Г.Занданшатар, УИХ-ын зарим гишүүд, Монголбанкны ерөнхиийлөгч, Санхүүгийн зохицуулах хорооны дарга нарын хамт эдийн засгийн тогтвортой байдлыг хангах арга хэмжээний талаар мэдээлэл хийлээ.
УИХ-ын дарга Г.Занданшатар "Түлш, шатахууны үнэ хямд байгаа энэ үед ОХУ-тай нефть импортлох гэрээ амжилттай хэлэлцэгдэж байна. Санхүү, эдийн засгийн тогтвортой байдлыг хангах чиглэлээр идэвхтэй ажиллаж байгаа. Орос улстай амжилттай хэлэлцээр хийсний үр дүнд хямд нефт авахаар болсон. Шатахууны үнийг тогтвортой байлгах бодлогыг боловсруулж, Монголбанктай хамтран хэрэгжүүлнэ. Дөрөвдүгээр сарын 15-наас шатахуун 300 төгрөгөөр хямдарна. Цаашид 400 төгрөгөөр хямдруулна.
Банкны өөрийн хөрөнгийн 500 хүртэл сая төгрөгийн зээлийн хүүд гурван сарын хугацаанд тодорхой хөнгөлөлт үзүүлэх чиглэлийг хэрэгжүүлэхээр ажиллаж байна. Банкны салбарын шинэтгэлийн хөтөлбөрийг ирэх долоо хоногоос хэлэлцэж эхэлнэ. Банк олон нийтийн хяналтад орно.
Өвчний тэргүүн фронтод ажиллаж байгаа эмч ажилчид, төрийн тусгай албан хаагчдыг тусгай нөхцөлөөр олгох ипотекийн зээлд хамруулна. Ипотекийн зээл, зээлийн хүүг дахин нэмж гурван сараар хойшлуулж байна. Хөтөлбөрт хамрагдах шаардлага хангасан боловч хүсэлт гаргаагүй зээлдэгчийн нийт жилийн нэрлэсэн хүүний 2 хувьтай тэнцэх дэмжлэг олгоно.
Татан буугдсан банкуудад байгаа төлбөрт хураагдсан хөрөнгийг эдийн засгийн эрэлтэд оруулж улсын хэрэгцээнд ашиглах ажлын хэсэг байгуулагдсан. 400 гаруй хөрөнгийг хураан авч битүүмжлээд байгаа.
“Алт-2” хөтөлбөрийг хэрэгжүүлнэ. Дэлхийд үнэ нь буугаагүй ганц бүтээгдэхүүн бол алт тул валютын нөөцөө нэмэгдүүлж, төгрөгийн ханшаа тогтвортой байлгана” гэлээ
