Д.Уайт: Дээрээс тушаасан, “UFC 249” болохгүй

Цар тахлын улмаас хоосорч орхисон спортын ертөнцийнхний гол найдлага нь холимог тулааны UFC холбоо, “UFC 249” болоод байсан билээ. Тэгвэл найдлага талаар болж, тэмцээнийг цуцалжээ.

Холбооны ерөнхийлөгч Дана Уайт энэ талаар “ESPN телевизээс ярьж, тэмцээнийг цуцлахыг хүссэн. Яах ч арга байсангүй” хэмээн ярьжээ. Олон нийтийн арга хэмжээ цуцлагдсан энэ үед тэрээр тэмцээнээ явуулахаар их зүтгэсэн. АНУ-ын хууль үйлчилдэггүй нутгийн уугуул иргэдийн газар нутаг дээр явуулах санаа хүртэл бодож олсон юм. Гэсэн ч эцсийн мөчид болихоос өөр аргагүй болов. Тэрээр “Дуудлага хамгийн дээд давхраас ирсэн” гэсэн ч тэмцээн цуцлахыг эрх баригчид тушаасныг хэлсэн бололтой.

“Бид энэ тэмцээнийг зохиох гэж өдөр шөнөгүй ажиллаж байсан. Гэвч өнөөдөр бидэнтэй дээд төвшнийхнөөс, тухайлбал ESPN, Disney-гээс утас цохиж, тэмцээнийг цуцал гэж хэллээ. Би юу гэх билээ. Тэд өнгөрсөн бямба гаригт утасдаж энэ талаар хэлэхэд нь би зохионо гэсэн. Сүүлдээ хүлээж авахаас өөр аргагүй боллоо. Тэд миний түншүүд, бид их удаан хамтарч ажилласан. Тийм учраас л саналыг нь хүлээж авлаа. Бид Калифорнид тэмцээн зохиох гэж байсан. Гэхдээ зүгээр, нөхцөл байдал хэвийн болохоор бид тэнд том тэмцээн зохион байгуулах болно.

“UFC 249”-д орох ёстой байсан тулаанчдадаа хандаж хэлэхэд, санхүүгийн тал дээр санаа зоволтгүй, та бүхэн гэрээний дагуу тулаанаа авах болно. Та бүхнийг сэтгэл хангалуун байлгахын тулд холбоо боломжтой бүхнийг хийнэ. Холбооны ажилтнууд ч санаа зовох хэрэггүй, бид ажлын байрыг тань хадгална, хэнийг ч халахгүй” гэж Д.Уайт ярьжээ.  

 

---