Сүүлийн мэдээгээр дэлхий даяар коронавирусийн 1.6 сая гаруй тохиолдол бүртгэгдэж 95 мянган хүн нас бараад байна. Эдгэрч эмнэлгээс гарсан хүний тоо 356 мянга боллоо.
Их Британид сүүлийн нэг хоногт вируст халдварын улмаас амиа алдсан хүний тоо 881-ээр нэмэгдсэн тухай албаны хүмүүс мэдэгдэв. Халдварт өртөн эрчимт эмчилгээнд ороод байсан тус улсын Ерөнхий сайд Борис Жонсоны биеийн байдал тогтворжиж энгийн тасагт шилжсэн байна.
Өнгөрсөн хоногт Испани улсад 683 нас баралт бүртгэгдсэн нь өмнөх хоёр өдрөөс буурч байгаа үзүүлэлт юм.
Харин АНУ-д эндэгдлийн тоо тогтмол өсөх хандлагатай байгаа нь сэтгэл түгшээж байна. Тус улсын хэмжээнд 16 мянган хүн амиа алдаад байгаагийг 7067 нь зөвхөн Нью-Йорк мужаас байгаа юм. Лхагва гаригт Нью-Йорк хотноо коронавирусийн 799 хүн нас баржээ. Мужийн захирагч Эндрью Куомо нөхцөл байдлыг есдүгээр сарын 11-ний өдрөөс хойш тохиосон хамгийн аймшигт явдал хэмээгээд өсөн нэмэгдэж буй дэгдэлтийн уршгаар муж улсын эдийн засагт сүйрэл ойрхон байгааг анхаарууллаа.
Хойд хөрш ОХУ-д вируст халдварын тохиолдол нэмэгдэх хандлагатай байна. Пүрэв гарагт тус улсад тохиолдлын тоо 10,131-д хүрлээ. Үүний дотор нийслэл Москва хотод 6,700 онош батлагдаад байна. Монгол улстай хил залгаа Буриад улс, Эрхүү муж, Алтайн хязгаарт нийт 106 тохиолдол бүртгэгдээд байна.