Ард иргэдээ цар тахлаас хамгаалахаар коронавирусийн эсрэг тэргүүн эгнээнд тулалдаж яваа баатрууд бол эмч нар. Ялангуяа ХӨСҮТ-ийнхний хичээл зүтгэл маш их. Тэр тусмаа ХӨСҮТ- ийн Шинэ болон сэргэж буй халдварын тасгийнхан. Манай улсад гаднаас халдвар тээн орж ирсэн 14 хүнийг энэ тасгийн хамт олон эмчилж буй. Жинхэнэ галын шугаманд тулалдаж яваа тэдний жанжин бол ХӨСҮТ-ийн Шинэ болон сэргэж буй халдварын тасгийн эрхлэгч Ж.Улаан. Тэрээр цар тахлын голомт болсон Ухань хотоос ирсэн оюутнуудтай хамт ажил дээрээ тусгаарлагдаж манлайлан ажиллажээ. Эмч нар нь бүтэн сарын турш гэртээ харихгүй ажиллаж байгаа тухай түүний ярианаас тэд бол үнэхээр баатрууд гэдэг нь маш тодоор харагдах биз ээ.
Би ХӨСҮТ-д ажиллаад 35 жил болж байна. Олон халдварын дэгдэлтийн үед голомтод нь ажиллаж байлаа. Хамгийн сүүлд 2015 онд улаанбурхан өвчний дэгдэлт гарсан. Тухайн үед хамгийн өргөн хүрээг хамарсан халдвар гэж үзэж байлаа. Энэ удаад бид коронавирус тухайн үеийн улаанбурханаас ч илүү тархах нь гэж тооцоолж эртнээс бэлтгэлээ сайн хангасан. Ер нь манай тасаг Эрүүл мэндийн сайдын тушаалаар байнга бэлэн байдаг онцлогтой тасаг л даа. Манай тасаг 50 ортой. Коронавирусийн халдвар илэрсэн хүнд уушгины хүнд хэлбэрийн хатгалгаа явагддаг учраас амьсгалын аппаратууд шаардлагатай. Манайх өмнө нь 20 хүнд хүчилтөрөгч өгөх хэмжээний техникийн боломжтой байсан. Үүнийгээ нэмэгдүүлж 50 хүнийг хүчилтөрөгчөөр хангах боломжтой боллоо. Мөн зөөврийн эхо, рентген аппаратаар хангагдсан. Ер нь бэлтгэлээ сайн хангасан гэж үзэж байгаа. Үүнээс гадна олон байгууллага эртнээс хамтарч ажилласны хүчинд халдварын тархалтыг барьж чадсан. Дээрээс нь ард түмэндээ үнэхээр баярлаж байна. Манай иргэд маш хариуцлагатай, төрийн байгууллагуудаас гаргасан шийдвэрийг хүндэтгэлтэйгээр хүлээн авч байна. Дэлхий дийлэхгүй байгаа энэ өвчнийг бид тогтоож байна гэвэл хүмүүс дооглох байх. Гэхдээ манай эмч нар үнэхээр сайн ажиллаж байгаа. Эмч, сувилагч нар маань 14 хоногоор ээлжлэн тусгаарлагдаж коронавирус илэрсэн өвчтөнүүдийг эмчилж байна. Нэг ээлж хоёр эмч, хоёр сувилагч, асрагч, ариутгагчаас бүрддэг. Тусгаарлагдаж 14 хоног эмчилгээ хийснийхээ дараа мөн 14 хоног ажиглалтад байгаа хүмүүсийн адил тусгаарлагдаж байгаа. Одоо бүр энэ хугацааг сунгаад 21 болгохоор болчихлоо шүү дээ. Өмнөх 14 хоногт эмчилгээ хийсэн ажилчид маань одоо өөрсдөө эмнэлэг дээрээ тусгаарлагдаж байгаа гэсэн үг. Халдвартай гэдэг нь батлагдсан өвчтөнийг эмчилж байсан учраас халдварын нууц хугацаагаа дуусахаас өмнө гэртээ харина гэсэн ойлголт байхгүй.
Анх гадаадаас ирж байгаа хүмүүсээс халуурсан сэжигтэй хүнийг ялгаж ХӨСҮТ-д тусгаарласан. Тухайн үед тусгаарлагдахаар ирж байсан хүмүүс маань айдастай, уур бухимдалтай ирсэн. Өвчин авчихсан байх вий гэсэн айдсаас гадна олон цаг нисээд ядарсан, өлссөн зэрэг нь нөлөөлдөг байх. Дээрээс нь бид битүү хамгаалалтын хувцас өмсчихсөн хүлээж авахаар бүр л айдас нь нэмэгдэг юм шиг байна лээ. Гэвч ингэхээс л аргагүй юм чинь яалтай билээ. Харин сүүлд бөөнөөрөө ирж байгаа хүмүүс бол тусгаарлагдана гэдгээ мэдэж байгаа учраас харьцангуй тайван, сэтгэл зүйн бэлтгэлтэй ирж байна. Би Уханиас ирсэн оюутнуудтай хамт эмнэлэг дээрээ тусгаарлагдаж ажилласан. Тэр оюутнууд бол маш дуулгавартай байж бидний заавар зөвлөмжийг сайн биелүүлсэн. 30 оюутан, нэг хүүхэд байсан юм. Халдварын голомтоос ирсэн учраас халдвар илрэх байх гэсэн бодолтой байлаа. Гэхдээ халдварын голомтоос ирсэн хүмүүс шүү гээд тэднээс айх сэтгэгдэл төрөөгүй. Ингэх эрх ч бидэнд байхгүй. Харин алдаа гаргачих вий гэдгээс л айсан. Азаар нэгээс нь ч коронавирус илрээгүй. Тусгаарлагдах хугацаа нь дуусаад гэртээ тусгаарлагдах зөвлөмжтэйгөөр гарсан. Түүнээс хойш хоёр сар өнгөрч байна.