Хятадын эрдэмтэд “ковид19” халдварыг эмчлэх өөр нэг арга олжээ

Хонконгийн их сургуулийн эрдэмтэд коронавирусийн халдвартай өвчтөнийг эмчлэх шинэ арга боловсруулжээ. Коронавирусээр өвчлөөд эдгэсэн амьтны цусанд вирусийн эсрэг биет бий болдог. Шинэ арга нь энэ эсрэг биеттэй цусны сийвэнг өвчтэй хүнд сэлбэх арга аж. “South China Morning Post” сонинд энэ талаар мэдээллээ.     

Тус улсын микробиологичид туршилтыг Сирийн алтан шишүүхэй дээр туршихад амжилттай болсон байна. Алтан шишүүхэйн бие организм дахь ACE2 гэдэг уураг нь хүнийхтэй төстэй байдаг учир сонгож авчээ. Ингээд шинэ төрлийн коронавирусээр халдварлуулахад эхний 14 хоногт уушиг, мөгөөрсөн хоолой, бөөр, дархлааны системтэй холбоотой хүнд шинж тэмдгүүд илэрсэн байна. Харин дараа нь зарим мэрэгчийн биеийн байдал сайжирч, эрүүлжиж, жин нь нэмэгдэж эхэлжээ. Эрдэмтэд эдгээр мэрэгчдийн цусны сийвэнг эрүүл мэрэгчдэд тариад “ковид19” вирусээр халдварлуулахад биед үзүүлэх хор нөлөө нь 10 дахин буурч байсан аж.    

Коронавирусийн шинэ төрөл нь амьтнаас амьтанд агаар дуслын замаар халддаг нь туршилтын явцад мөн тодорхой болжээ.

Эрдэмтэд дээрх судалгааны дүнгээ улсынхаа Анагаахын зөвлөлд өгөөд хариу хүлээж байгаа аж. Зөвлөлөөс туршилтын үр дүнг нь хянаж үзээд боломжтой гэж үзвэл хүн дээр турших зөвшөөрөл өгдөг ажээ.

Одоогийн байдлаар коронавирусийн шинэ төрлийг эмчлэн “Мефлохин” хэмээх эмийг Анагаах, биологийн холбооны агентлагаас өнгөрсөн сарын 28-ны өдөр танилцуулаад байгаа билээ. Уг эмчилгээг вирусийн эмчилгээг гардаж хийж байсан БНХАУ, Францын эмч нарын туршлагад тулгуурлан бүтээсэн юм.


Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд eagle.mn хариуцлага хүлээхгүй.

Сэтгэгдэл бичих (0)