Ерөнхий сайд У.Хүрэлсүх улс орон даяар өндөржүүлсэн бэлэн байдлын зэрэгт шилжсэнтэй холбогдуулан эдийн засгийг дэмжих чиглэлээр Засгийн газраас авч хэрэгжүүлэх арга хэмжээний талаар мэдэгдэл хийж байна. Тэрээр “Засгийн газраас хоёр чиглэл барьж байгаа. Нэг дэх нь монгол хүний эрүүл мэндийн байдлыг хангах. Хоёрдугаарт, эдийн засгийн нөхцөл байдлыг сайжруулах. Өгсөн үүрэг даалгаврыг сайн хэрэгжүүлж байна гэж ойлгож байгаа. Засгийн газар, УОК цаг тухай бүрт хуралдаж, тодорхой шийдвэрүүдийг гаргасны үр дүнд Монгол Улс өнөөдөр тайван байна. Дотроо халдварын тохиолдол бүртгэгдээгүй цөөн улсын нэг нь Монгол Улс болсон. Одоо засаглах болсон. Бүх шийдвэрийг ард иргэд дагаж мөрдөх ёстой. Шуудхан хэлэхэд бид үхэх үү, сэхэх үү гэдэг сонголтод тулгарсан. Коронавирусийн халдвар илэрсэн ч хяналтдаа авсан нь сайн хэрэг. Гэхдээ бид өндөр сонор сэрэмжтэй байх нь эрхэм зорилго болж байна. Ард иргэд эрүүл байх ёстой. Бид гуравхан сая хүн амтай. Цөөн хүн амтай улсад энэ халдвар тархвал ямар байдал үүсэх билээ. Бид боломжтой нөөц бололцоогоо дайчилж ашиглаж байгаа.

Улсын нөөцөөс нийт 17 тэрбум төгрөг гаргасан. Улсын хэмжээнд ариутгал, халдваргүйжүүлэлт хийлээ. Мөн 20.6 тэрбум төгрөгөөр тоног төхөөрөмж, байгууллагуудын ажилчид, эм тариа хувцас хэрэглэлд зарцуулна. Цаашдаа 159  гаруй тэрбум төгрөгийг эрүүл мэндийн салбар болоод холбогдох байгууллагад зарцуулна. Нийтдээ Монгол Улс 200 орчим тэрбум төгрөг зарцуулж байна гэж ойлгож болно. Үүнээс гадна эдийн засгийн хүндрэлээс гаргах асуудлаар ажиллаж байна.

Засгийн газраас аж ахуйн нэгж, бизнес эрхлэгчдээ дэмжих чиглэлээр дараах шийдвэрүүдийг гаргалаа.

Мэдээллийн дараа сэтгүүлчдийн асуултад хариуллаа.

Засгийн газраас зээл төлөлтийг хойшлуулах шийдвэр гаргасан ч арилжааны банкууд шийдэлд хүрээгүй гэж байна. Энэ асуудлыг хэрхэн шийдвэрлэж байгаа юм бэ?

-Арилжааны банк, Монголбанкны удирдлагуудтай уулзсан. Аж ахуйн нэгжүүд, ажилтан албан хаагчид, бизнес эрхлэгчдийн нөхцөл байдал хүндэрч байгааг хэлсэн. Монголбанк бол Засгийн газарт хамаарагдахгүй байх хуультай. Монголбанк бодлогын хүүгээ нэг хувь буулгасан. Дахиад буулгах талаар хүсэлт тавина. Арилжааны банкууд хүүгээ бууруулах ёстой. Банкны реформ хийх цаг нь болсон.

-УИХ-ын сонгуулийг хойшлуулах уу?

-Бүх зүйл хуулийн дагуу явна. Сонгууль хойшлуулах нөхцөл байдал бүрдээгүй гэж бодож байна. Нөхцөл байдал хүндэрвэл энэ талаар ярина. Гэхдээ бид Ерөнхийлөгчийн уриалгыг хүндэтгэж судалж байгаа. Шийдвэрийг УИХ гаргана.

-Тавдугаар сарын 25-наас Засгийн газар огцрох уу?

-Засгийн газар огцрохгүй. Нэмэлт, өөрчлөлт оруулсан Үндсэн хууль тавдугаар сарын 25-наас хэрэгжиж эхлэх ёстой. Гэхдээ Үндсэн хуулийг дагаж бусад хууль гаргах ёстой. Дагавар хуулиудаар Засгийн газар огцрох, шинээр бүрдэх эсэхийг шийдвэрлэнэ. УИХ-аас гаргасан хуулийг Засгийн газар хэрэгжүүлнэ.

-ҮАБЗ-өөр эдгээр шийдвэрийг хэлэлцэх үү?

-ҮАБЗ шаардлагатай тохиолдолд улс орны аюулгүй байдлыг хангах чиглэлээр зөвлөмж гаргадаг. ҮАБЗ-ийн гишүүд нэг цонхоор харж байна гэж ойлгож байна. Бид гурав улсын язгуур эрх ашгийн хүрээнд нэгдэж ажиллаж байна.

-Таван их наяд төгрөгийн эх үүсвэрийг хаанаас гаргах вэ?

-Төсвийн орлого 275 тэрбум төгрөгөөр дутагдалтай явж байгаа. Таван их наяд төгрөгийг төрийн сангийн мөнгөн хөрөнгийн удирдлагыг оновчтой хэрэгжүүлэх замаар шийдвэрлэнэ. Өнгөрсөн гурван жилийн хугацаанд санхүүгийн сахилга батыг сайжруулсан. Өрийн дарамтыг бууруулж чадсан учраас энэ мөнгийг шийдвэрлэх боломжтой.

Ажлын байраа багасгаагүй хувийн хэвшлийн ажилчдад 200 мянган төгрөг олгоно гэсэн. Энэ талаар тодорхой мэдээлэл өгөхгүй юү?

-Ажлын байраа багасгаагүй аж ахуйн нэгжүүд нийгмийн даатгалын шимтгэлээ төлж байгаа. Бүх мэдээлэл нь мэдээллийн санд хадгалагдаж байгаа учраас үүн дээр үндэслэж 200 мянган төгрөгийг олгоно.