Олон улсын олимпын хороо “Токио 2020” олимпын наадам хугацаандаа зохиогдож чадахгүй байх эрсдэлд орсныг хүлээн зөвшөөрлөө. Хорооны Гүйцэтгэх зөвлөл өчигдөр хуралдаж коронавирусийн дэгдэлттэй холбоотойгоор үүссэн нөхцөл байдлын талаар нарийвчилж ярилцсан байна. Хурлаас ямар нэг шийд гараагүй ч урьд өмнөх хурлуудыг бодвол олимпын наадам хойшлох эрсдэл үүссэнийг хүлээн зөвшөөрчээ. Улмаар дөрвөн долоо хоногийн дотор энэ асуудлыг эцэслэн шийдвэрлэхээр тогтсон байна.
“Дэлхий даяар байдал улам дордсоор байна... Гүйцэтгэх зөвлөл өнөөдөр ОУОХ-ны цаашид авч хэрэгжүүлэх арга хэмжээний талаар хэлэлцлээ. Энэхүү арга хэмжээ нь долдугаар сарын 24-нөөс наймдугаар сарн 9-нд болох ёстой зуны олимпын наадмын төлөвлөгөөнд өөрчлөлт оруулах, эхлэх хугацааг өөрчлөх асуудал байлаа. Энэ асуудлыг ойрын дөрвөн долоо хоногийн дотор эцэслэн шийдэхээр боллоо” хэмээн Гүйцэтгэх зөвлөлөөс гаргасан албан ёсны мэдэгдэлд дурдсан байна. Олимпын наадмыг хойшлуулах нь хэнд ашиггүй, ямар ч асуудлыг шийдэхгүй, ОУОХ наадмыг төлөвлөсөн хугацаандаа зохион байгуулахыг эрмэлзэж байгаа гэдгийг Гүйцэтгэх зөвлөлийн мэдэгдэлд онцолжээ.
ОУОХ-ны ерөнхийлөгч Томас Бах өчигдөр тамирчдад хандан нээлттэй захидал бичсэн. Тэрээр уг захидалдаа олимпийн наадам түүхэн хүнд нөхцөлд орсныг хүлээн зөвшөөрч, "Олимпын наадмыг хойшлуулах асуудал цагийн байдлыг харзнасан байдалтай байна” гээд ”11 000 тамирчны олимпын мөрөөдлийг үгүй хийх нь маш хүнд шийдвэр байх болно” хэмээн бичжээ.
Их Британи, АНУ-ын хөнгөн атлетикийн холбоо, нэг бус ҮОХ-ноос ОУОХ-нд хандан олимпын наадмыг хойшлуулах хүсэлт тавиад байгаа юм.
