Э.Даваачимэг мөнгө, П.Номин-Эрдэнэ, З.Болортунгалаг нар хүрэл медаль хүртлээ

Азийн АШТ-ий хошой хүрэл, залуучуудын ДАШТ-ий алт, хүрэл медальт, ОУХМ Э.Даваачимэг Шинэ Делид мөнгөн медаль хүртлээ.Тэрбээр Энэтхэгийн дэвжээнд шөвгийн наймд Вьетнамын Ти Хуан Дао, хагас шигшээд Алтынай Сатылганыг тус бүр цэвэр ялж шигшээд шалгарсан. Тэгвэл алтан медалийн төлөөх барилдаанд “Рио-2016” олимпийн наадам болон дэлхийн гурван удаагийн аварга Рисако Кавайд оноогоор цэвэр (0:10) ялагдлаа.

Чөлөөт бөхийн Азийн АШТ-ий эмэгтэйчүүдийн 62 кг-ын жинд “Алдар” спорт хорооны тамирчин ОУХМ П.Номин-Эрдэнэ Шинэ Делигийн дэвжээнээс манайханы хоёр дахь хүрэл медалийг авчирлаа. Түүний хувьд өсвөр үе, залуучууд, насанд хүрэгчид гэсэн гурван насны ангилалд тивийн аваргаас хүрэл медаль хүртээд байна.

2016, 2019 оны Азийн АШТ-ий хүрэл медальт, ОУХМ З.Болортунгалаг гурав дахь хүрэл медалийг эх орондоо авчирлаа.  Тэрбээр хэсгийн барилдаанд Узбекистаны Набира Эсенбаевад 4:6-аар ялагдсан ч Казахстаны Гаухар Мукатайг цэвэр ялсан. Улмаар хагас шигшээд өнгөрсөн жилийн Азийн аваргад энэ шатанд таарч ялагдаж байсан Японы Наоми Рүикэд цэвэр ялагдсан. Харин хүрэл медалийн төлөөх барилдаанд Узбекистаны Эсенбаеватай дахин таарч, даагаа амжилттай нэхэж 7:4-өөр ялснаар хүрэл медалийн тавцанд зогсов.
Ийнхүү манай эмэгтэй бөхчүүд Энэтхэгийн нийслэлд аваргалж чадаагүй ч гурван мөнгө, гурван хүрэл медальтайгаар тэмцээнээ өндөрлүүллээ.


Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд eagle.mn хариуцлага хүлээхгүй.

Сэтгэгдэл бичих (0)