Ф.Смолов “Реал”-ын хаалганд гоолдлоо

Испанийн хөлбөмбөгийн дээд лиг Примера дивизионы 24 дүгээр тойрогт тэргүүлэгч “Реал” Мадрид хоёр оноо алдлаа. Тэд “Сельта Виго”-той талбайдаа тэнцсэн юм. Энэ тоглолтын эхний гоолыг довтлогч Федор Смолов оруулсанд оросууд бөөн баяр болж байна. Тэрээр Яго Аспасын маш оновчтой дамжуулалтаар эхний гоолыг оруулсан юм. Орос тоглогчдоос хамгийн сүүлд Александр Мостовой л “Реал”-ын талбайд гоолдож байсан юм.

Федор Смолов “ОХУ 2018” ДАШТ-д гялалзах ёстой байсан ч Хорваттай хийсэн хариуцлагатай тоглолтод торгуулийн цохилт алдан Еврот тоглох мөрөөдөл нь бараг унтраад байсан. Гэсэн ч энэ өвлийн цолилцооны цонхоор их зориг гарган “Сельта”-д зээлээр очсон юм. “Реал”-ын хаалганд гоолдсон явдал түүний оролдлого бүтэх магадлалыг эрс нэмэгдүүллээ. Яг одоо Ф.Смоловыг авчирсандаа Испанийн багийн удирдлагууд ч, хөгжөөн дэмжигчид ч сэтгэл хангалуун байна. А.Мостовойг багийн лидер байх үед “Царь” гэж хочилдог байсан “Сельта”-гийн дэмжигчид “Реал”-тай тэнцсэний дараа Ф.Смоловыг мөн тэгж нэрлэж байна. Хөгжөөн дэмжигчдийн хувьд Ф.Смолов цаашдаа амжилттай тоглож, Ла лигт байр сууриа баттай эзэлсэн А.Мостовой, В.Карпин нарын зиндаанд хүрэх эсэхийг харах л үлдлээ.

 

Ла Лигийг 24 тойргийн дараа “Реал” 53 оноотой тэргүүлж, “Барселона”, “Хетафе”, “Атлетико” Мадрид багууд 52, 42, 40 оноотой удаалж явна.     

“Реал” Мадрид – “Сельта” 2:2 (0:1, 2:1)

Хоёрдугаар сарын 16, “Сантьяго Бернабеу” цэнгэлдэх.

Гоол:

0:1 – 7 Смолов, 1:1 – 52 Кроос, 2:1 – 65, пенальти Рамос, 2:2 – 85 Санти Мина.

Реал Мадрид – Куртуа, Рамос, Марсело, Варан, Карвахаль, Бэйл (Менди, 84), Кроос (Модрич, 81), Азар (Винисиус Жуниор, 73), Каземиро, Вальверде, Бензема.

Сельта – Рубен Бланко, Араухо, Мурильо, Васкес (Систо, 55), Оласа, Айду, Йокушлу, Рафинья, Брадарич (Санти Мина, 83), Смолов (Денис Суарес, 70), Аспас.

Шар хуудас:

Оласа (57), Бэйл (72), Карвахаль (74), Йокушлу (76).

---