2016 онд 97 цахим гэмт хэрэг бүртгэгдэж байсан бол 2018 онд 659 болж нэмэгджээ
Манай улсын компьютер, ухаалаг утасны хэрэглээг дагаад цахим гэмт хэргийн тоо жил бүр нэмэгдэж иржээ. 2016 онд 97, 2017 онд 195, 2018 онд 659 цахим гэмт хэрэг цагдаагийн байгууллагад бүртгэгджээ. Харин 2019 оны эхний таван сарын байдлаар 384 гэмт хэрэг бүртгэгдсэн байна. Тодруулбал, 2016 оноос хойш нийт 1335 цахим гэмт хэрэг бүртгэгджээ. Цахим гэмт хэргийн хохирогчдын дийлэнх нь эмэгтэйчүүд болон насанд хүрээгүй хүүхдүүд байдаг байна. Энэ нь цахим гэмт хэрэг, түүнээс урьдчилан сэргийлэх арга хэлбэрийн талаар мэдлэг дутмаг, бага насны хүүхдэд тавих хараа хяналт сул зэргээс үүдэлтэй юм.
Эрүүгийн хуулийн тусгай ангийн 26 дугаар бүлэгт “Цахим мэдээлэлд хууль бусаар халдсан, цахим мэдээллийн сүлжээнд хууль бусаар халдах программ, техник хэрэгсэл бэлтгэсэн, борлуулсан, хор хөнөөлт программ хангамж бүтээсэн, ашигласан, тараасан тохиолдолд 2700-40000 нэгжтэй тэнцэх хэмжээний төгрөгөөр торгох, эсхүл 1 жилээс 5 жил хүртэл хугацаагаар зорчих эрхийг хязгаарлах, эсхүл 6 сараас 12 жилийн хугацаагаар хорих ял шийтгэнэ” хэмээн цахим гэмт хэрэгт хүлээлгэх хариуцлагыг хуульчилсан байдаг юм.