"Замын-Үүдээр хил нэвтэрсэн 104 иргэнийг гурван зочид буудалд хуваан тусгаарласан"
Засгийн газар энэ долоо хоногт ээлжит бусаар хуралдаж, хилээр орох зорчигчдыг бүрэн хязгаарласан. Шаардлагатай тохиолдолд монгол иргэнээ хил нэвтрүүлэх тухай ч танилцуулсан. Энэ дагуу өчигдөр Замын-Үүдээр 104 монгол иргэнийг хил нэвтрүүлсэн талаар ХӨСҮТ-ээс өнөөдөр танилцуулсан.
Тэгвэл эдгээр иргэнийг Замын-Үүдийн зочид буудлуудад тараан байршуулсан, хяналт, тусгаарлалт байхгүй байна гэдэг шүүмжлэл цахим хуудсаар өрнөж байна. Харин үүнийг ХӨСҮТ-өөс үгүйсгэж байгаа юм. Дээрх 104 иргэнийг хил нэвтрүүлэхэд Хилийн мэргэжлийн хяналтын газар, тус сумын эрүүл мэндийн байгууллага хяналт тавьсан бөгөөд Замын-Үүдэд тусгайлан бэлдсэн гурван зочид буудалд хуваан байршуулсан байна. Тэднийг ДЭМБ-ын зөвлөмжийн дагуу 14 хоног тусгаарлаж, шинжилгээ авч, ажиглах юм.