Хүлэгү болон Номадиа пикчерсийн хамтын бүтээл “Бүтэн амьдрал” олон ангит кино 2-р сарын 15-нд Боловсрол телевизээр цацагдана. Зургаан сарын турш үргэлжилж буй нүсэр зураг авалттай 24 ангит бүтээлд оролцсон жүжигчдийн төлөөлөл киноныхоо тухай сэтгэгдлийг та бүхэнтэй хуваалцаж байна.
“Х-ТҮЦ” продакшны жүжигчин З.Онон: Олон өдрийн бодол, тэсвэр тэвчээр, оролдлого зүтгэлийн дүнд энэ дүрийг бүтээх гэж хичээлээ
Кинонд тоглох санал аваад их эмээж байлаа. 400 гаруй үзэгдэл тийм ч амар даваа байгаагүй ээ. Номин хэмээх бүсгүйг сэтгэлийнхээ гүнээс мэдэрч, тийм хүнийг амилуулж, сэтгэл хөдлөл бүрийг нь илэрхийлж тоглоход асар их зүтгэл шаардагдсан. Тун удахгүй та бүхэнд өргөн барьж байгаа бидний энэ бүтээл заавал нэг зүйлийг бодогдуулна гэдгийг амлая. Киноны маань хэсэг бүр амьдралын тухай эргэцүүлэх боломжийг олгоно. Ямар сайхан хайраар энэ ертөнцөд мэндэлж, ямар гайхалтай хайраар өөрийнхөө амьдралыг бүтээж буйгаа та ойлгох болно.
“Мөрөөдлийн театр”-ын жүжигчин Г.Эрхэмбаяр: Энэ кино бол амьдрал
“Бүтэн амьдрал” олон ангит киноны санал ирэхэд бага зэрэг эргэлзсэн. Гэхдээ яагаад ч юм тоглох ёстой гэсэн бодол төрж байлаа. Энэ кино бол жаргал, зовлон хосолсон хүний амьдралын тухай өгүүлэл юм. Туйлдаа хүртэл үзэн ядмаар, голдоо ортол гомдож туньмаар, нулимсаа асгартал уйлж тайвширмаар, сэтгэлээ сэргэтэл инээмээр, хажууд байгаа хүн бүрийг халуун дотноор хайрламаар тийм л мэдрэмжийг та манай киноноос мэдрэх болно.
Монгол Улсын Гавьяат Жүжигчин С.Өлзийхүү: Чанартай бүтээл хийх гэж хөдөлмөрлөсөн багийнхнаараа бахархаж байна
Энэ кинонд гардаг Номин бодит амьдрал дээр олон бий. Бүсгүй хүний хүч, эрээн бараантай амьдралын тухай ийм гоё өгүүлэх бүтээл ойрд мэндлээгүй гэдгийг би онцолмоор байна. Түүнчлэн урлагийн бүтээлээр дамжуулж үзэгч олондоо ухаарал бэлэглэх гэсэн баг, хамт олондоо талархал илэрхийлье. Хичнээн шөнийн нойроо зураг авалтдаа зориулсныг тоолж барамгүй. Энэ их хөдөлмөр, зүтгэлийн дүн гарч элэг бүтэн, энх тунх амьдралын төлөө хүн бүхэн хичээх ёстойг ойлгож ухаарна гэдэгт итгэлтэй байна.
Жүжигчин Г.Золзаяа: Сайхан амьдрал гэж юу болохыг илүү ихээр ойлгож авлаа
Жүжигчин мэргэжлийг сонгосондоо дахин талархах боломжийг энэ бүтээл надад олгосон. Залуу насандаа ийм сайхан кинонд тоглосон учраас өөрийгөө азтай гэж бодож байна. Байгаа зүйлдээ сэтгэл хангалуун байж бие биенээ хайрлах хэрэгтэй гэдгийг тус бүтээлээрээ дамжуулж үзэгчдэдээ уриалмаар байна.
Жүжигчин Э.Пүрэвжаргал: “Бүтэн амьдрал” киноноос хайрын хүчийг мэдэрнэ
Хайрт хань, найз залуу, үерхдэг бүсгүйгээ чангаас чанга тэвэрмээр санагдах тэр мэдрэмжийг манай киноноос авна. Магадгүй анхны хайраа дурсаж хундага дарс шиммээр санагдаж ч болох. Сэтгэл догдлуулам, заримдаа өр өвтгөм мэдрэмж төрөх байх. Ийм гэгээлэг, хэлэх гэсэн зүйл ихтэй сайхан бүтээлд дүрээ үлдээсэндээ баяртай байна. Та бүхэн заавал үзээрэй.
Жүжигчин Д.Бямбадорж: Дүр бүрийг нь хайрламаар кино болсон доо
Миний хувьд “Мэргэжил сургалтын төв”-ийг дөнгөж төгсөөд, амьдралынхаа гарааг эхэлж буй залуугийн дүрд тоглодог. Амьдралд дөнгөж хөл тавьж байгаа залуустаа үлгэр дуурайл болж дүрээрээ дамжуулан нэг ч гэсэн ухаарал өгөхийг хүсэж байлаа. Миний эгчийн дүр бол гайхамшигтай эмэгтэй. Тийм бүсгүйчүүд Монголд олон байгаа. Энэ кинонд хэлэгдсэн текст, жижиг хэсэг, зураг авалт бүр надад үнэ цэнтэй бас хайрламаар байсан гэдгийг тодотгомоор байна.
