Нээлттэй хувьцаат компаниуд ногдол ашиг тараахдаа зөвхөн “Үнэт цаасны төвлөрсөн хадгаламжийн төв” ХХК-иар зуучлуулахаар болжээ. Тодруулбал, Санхүүгийн зохицуулах хорооны өнгөрсөн сарын 29-ны хуралдаанаар компаниуд ногдол ашиг тараахдаа “Үнэт цаасны төвлөрсөн хадгаламжийн төв” ХХК-иар дамжуулан Компанийн тухай хуулийн 46 дугаар зүйлийн 46.1-д заасны дагуу ногдол ашиг төлөх өдрийг тодорхой нэг өдрөөр тогтоон эхний хоёрдугаар улиралд багтаан тараахаар болсон байна. Үүнийг жижиг хувьцаа эзэмшигчдийн эрх ашгийг хамгаалах зорилготой хэмээн шийдвэр гаргагчид тайлбарлав.

Түүнчлэн ногдол ашиг хуваарилалтын тайлангаа ногдол ашиг хуваарилж дууссан өдрөөс хойш ажлын 15 хоногийн дотор Монголын хөрөнгийн биржид хүргүүлэх аж.