УИХ-ын чуулганы хуралдаан эхэллээ. Хэлэлцэх асуудлын талаар гишүүд үг хэлэв. Тухайлбал, УИХ-ын гишүүн Т.Аюурсайхан УИХ-ын гишүүн Н.Номтойбаярын бүрэн эрхийг түдгэлзүүлэх саналыг 48 цагийн дотор хэлэлцэн шийдвэрлэх хуультайг сануулав. Тэрбээр “Ерөнхий прокурор бүрэн эрхийнхээ хүрээнд энэ асуудлыг оруулж байгаа. Түүнээс биш гишүүд байна уу, үгүй юү гэж явахгүй. УИХ-ын гишүүний халдашгүй байдлын дэд хороо ирц нь бүрдсэн л бол хуралдах ёстой. Байнгын хороо ч ирц нь бүрдвэл хуралддаг. Нэг гишүүн байхгүй гээд хурлаа хийхгүй, хууль зөрчиж болохгүй. Дөрвөн гишүүний санал хоёр хоёроор тэнцвэл саналын томъёоллыг дэмжээгүйд тооцно. Ийм хуультай шүү дээ. Хууль ноцтой зөрчөөд байхад УИХ-ын удирдлагууд ямар байдлаар хандаж байна вэ. УИХ хууль зөрчөөд байвал бусад байгууллага нь яах юм бэ. Яаж ард иргэдээ хуулиа мөрд гэж хэлэх юм бэ. УИХ-д итгэх итгэл буурч байна шүү” гэлээ.
Энэ талаар УИХ-ын дэд дарга Л.Энх-Амгалан “УИХ-ын гишүүний бүрэн эрхийг түдгэлзүүлэх тухай асуудал нь УИХ-ын болон УИХ-ын чуулганы хуралдааны дэгийн хуулиар зохицуулагддаг. Эхлээд УИХ-ын гишүүний халдашгүй байдлын дэд хороо хуралдаж, санал дүгнэлтээ гаргана. Үүний дараа Хууль зүй болон Төрийн байгуулалтын байнгын хороо хуралдаж, шийдвэрээ гаргах дэгтэй. Дэд хорооны хурал 48 цагийн дотор эхэлсэн. Дэд хорооны дарга Ц.Нямдоржийн тайлбарласнаар Ерөнхий прокурор дэд хороог таван гишүүний бүрэлдэхүүнтэй байхад саналаа өгөх ёстой гэж байгаа. Бичиг ирэхэд гурван гишүүн байсан. Энэ асуудлаар дэд хорооны дарга тодорхой тайлбар өгсөн гэж бодож байна” гэсэн юм.
Чуулганы хуралдааны эхэнд Оюуны өмчийг эдийн засгийн эргэлтэд оруулах тухай хуулийн төслийн эцсийн хэлэлцүүлгийг хийж байна.
