Туркийн шигшээ багийн довтлогч асан, ДАШТ-ий хүрэл медальт Хакан Шукюр өдгөө Вашингтонд таксины жолооч хийн амьдарч байна. Хөлбөмбөгчийн замналаа өндөрлөөд улстөрч болж, Р.Т.Эрдоганы намд элссэн тэрээр нэг их удалгүй буцаад гарсан байдаг. Гарах болсон шалтгаанаа тэрээр улс төрийн дээд шатанд авлига хээл хахууль ужгирсан болохыг мэдэж, эвлэрэхгүй байсан учраас гарсан гэж тайлбарладаг. Хөлбөмбөгийн ертөнцөд од болон гялалзаж, нэгэн улсын нүүр царай болж явсны хувьд Х.Шукюрт хурааж хумьсан юм багагүй бий. Гэвч Туркийн хууль хяналтынхан бүх хөрөнгийг нь царцаасан буюу үнэндээ бол дээрэмдчихжээ. Р.Т.Эрдоганыг шүүмжилснийхээ төлөө ийнхүү цээрлэл үзсэн байна. Өдгөө тэрээр АНУ руу дүрвэсэн бөгөөд Вашингтон хотод “Uber” компанийн такси үйлчилгээнд жолоочоор ажиллан амьжиргаагаа залгуулж байгаа юм.
Эх оронд нь байнга мөрдөн мөшгиж, дайралт хийж байснаас болж 2015 онд АНУ руу гэр бүлээрээ гарч явжээ. 2016 онд болсон төрийн эргэлт хийх оролдлогыг зохион байгуулсан хүмүүсийн нэрсийн жагсаалтад түүний нэр бий. Тийм ч учраас Туркийн хууль хяналтынхны хар жагсаалтад багтсан. АНУ руу гарсны дараа хуулийнхан эцгийг нь баривчлан шоронд хорьж, хорт хавдар өвчтэй, эдгэшгүй гэж оношлогдсоны дараа л суллажээ.
Дэлхийн хөлбөмбөгийн аварга шалгаруулах тэмцээний түүхэн дэх хамгийн хурдан гоолын эзэн, хөлбөмбөгийн амьд домгуудын нэг Хакан Шукюрийн амьдрал ийнхүү ганцхан хүн /Р.Т.Эрдоган/-ээс болж хүнд байдалд оржээ. Тэрээр саяхан өгсөн ярилцлагадаа бүх өмч хөрөнгө нь Туркт байгаа бөгөөд түүнийг Р.Т.Эрдоган булаасан тухай ярьсан байна.
