Монгол Улсыг ФАТФ-ын “саарал жагсаалт”-д орсон талаар өнгөрсөн оны аравдугаар сарын 18-нд албан ёсоор зарласан.
Үүнтэй холбогдуулан Төв банкнаас энэ онд багтан ФАТФ-ын “саарал жагсаалт”-аас гарах зорилт тавьсан талаараа танилцуулсан. Тэгвэл Үр дүнтэй байдлын тайланг хэлэлцэх Олон улсын хамтын ажиллагааны хяналтын бүлгийн хурал жилд гурван удаа болдог. Эхний хурал энэ сард болно. Монгол Улсын хувьд энэ хурлаар тайлангаа хэлэлцүүлэхээр хүргүүлээд буй. Энэ талаар Монголбанкны ерөнхийлөгч Б.Лхагвасүрэн “Уг хурлаар манай тайланг хэлэлцсэний дараа ФАТФ-ын процессын дагуу үнэлгээний баг манай улсад ирж газар дээрх хяналт шалгалтыг хийх дараагийн үе шат байгаа. Үүний дараа үнэлгээний багаас Монгол Улс ФАТФ-тай тохирсон зургаан ажлыг хэрэгжүүлэх талаар хангалттай арга хэмжээ авсан гэж үзсэн тохиолдолд ФАТФ-ын ээлжит хурлаар манай асуудлыг хэлэлцүүлэх нөхцөл бүрдэнэ” гэсэн юм.
