УИХ-ын чуулганы хуралдаанаар Эрүүгийн хуульд өөрчлөлт оруулж, хөөн хэлэлцэх хугацааг яллагдагчаар татагдах хүртэл тоолохоор боллоо. Өмнө нь шинэчилсэн Эрүүгийн хуульд гэмт хэргийн хөөн хэлэлцэх хугацааг анхан шатны шүүхийн шийдвэр гарах хүртэл тоолохоор тусгасан нь олон хэрэг хэрэгсэхгүй болсон шалтгаан болсон гэж үзсэн. Тиймээс гэмт хэргийн хөөн хэлэлцэх хугацааг хуучнаар нь буюу яллагдагчаар татагдах хүртэл тоолохоор өөрчлөв.

Үүнээс гадна Эрүүгийн хуульд нэмэлт, өөрчлөлт оруулах хуулийг дагаж мөрдөх журмын тухай хуулийг УИХ-ын чуулганы өнгөрсөн баасан гарагийн хуралдаанаар баталлаа. Энэ хуульд онцлох гурван зүйл тусгажээ. Нэгдүгээрт, шүүхийн шатанд хөөн хэлэлцэх хугацаа нь дууссан үндэслэлээр хэрэгсэхгүй болсон хэргүүдийг сэргээж шалгана. Хоёрдугаарт, 2017 оны долдугаар сарын 1-нээс хойш өнөөдрийг хүртэлх хугацаанд прокурорын шатанд хөөн хэлэлцэх хугацаа нь дууссан үндэслэлээр хэрэгсэхгүй болсон хэргүүдийг сэргээж шалгана. Гуравдугаарт өнөөдрийг хүртэл мөрдөн байцаалтын шатанд байгаа хэргүүдийн хөөн хэлэлцэх хугацааг зогсоох, энэ нь эрүүгийн хуулийн 1.9, 1.10-т орсон өөрчлөлттэй хамаарахгүй гэж заажээ. Ингэснээр шинэчилсэн Эрүүгийн хууль хэрэгжиж эхэлсэн өдөр буюу 2017 оны долдугаар сарын 1-нээс хойш хөөн хэлэлцэх хугацаа нь дуусаж, хэрэгсэхгүй болсон хэргүүдийг сэргээн шалгах нөхцөл бүрдэв.

Харин хэрэгсэхгүй болсон хэргүүдийн талаар УИХ-ын гишүүн Б.Пүрэвдорж өнгөрсөн сард “2019 оны аравдугаар сарын 20-ны байдлаар нийтдээ 629 гэмт хэрэг хэрэгсэхгүй болсон. Үүний үр дүнд 1200 гэмт хэрэгтэн ял аваагүй. Авлига, албан тушаалтны 42 гэмт хэрэг хэрэгсэхгүй болсон. Үүний дунд “оймсны” гэх хэрэг багтана. Оймсноос нь 25 сая төгрөг, гэр, албан тасалгаанаас нь хахуулийн нэг тэрбум төгрөг илэрсэн.  Гэтэл ял авалгүйгээр эрх чөлөөтэй алхаж байна. 629 гэдэг тоог шүүх, прокурорын байгууллагаас авсан. Үүнээс хойш дахиад 47 гэмт хэрэг хэрэгсэхгүй болсон. Энэ бол прокуророос өгсөн тоо. Шүүхээс дахиад хэдэн хэрэг хэрэгсэхгүй болгож байгааг мэдэхгүй. Хууль нь ийм юм чинь өөр яалтай билээ. Тун удахгүй авлигын 11 гэмт хэрэг хэрэгсэхгүй болно. Үүнд алдарт “Жаст”-ын  Ш.Батхүүгийн хэрэг байгаа.  Үүний хохирол 43 тэрбум төгрөг” хэмээн мэдээлж байлаа.

Тэгвэл Улсын Ерөнхий прокурорын орлогч М.Чинбатын хэлснээр 2017 оны долдугаар сарын 1-нээс хойш хөөн хэлэлцэх хугацаа нь дууссан авлига, албан тушаалын хэрэг 13 байгаа аж. Тэрээр “2017 оны долдугаар сарын 1-нээс хойш хөөн хэлэлцэх хугацаа нь дууссан үндэслэлээр хэрэгсэхгүй болсон хэргүүдийн тоон судалгаа гаргасан. 2018 онд дөрвөн хэрэг, 2019 онд есөн хэрэг Эрүүгийн хуулийн хөөн хэлэлцэх хугацаа дууссан үндэслэлээр хэрэгсэхгүй болгосон. Өөрөөр хэлбэл, Эрүүгийн хуулийн 22.1-т заасан эрх мэдэл, албан тушаалын байдлаа урвуулан ашиглах, хахууль өгөх, авах, төрийн эрх мэдэлтэн албан тушаалын байдлаа урвуулан ашиглахаар зүйлчилсэн 13 хэргийг хэрэгсэхгүй болгожээ” гэв.