ДХБ-ын давж заалдах байгууллага зогсонги байдалд оржээ
Дэлхийн худалдааны байгууллагын ерөнхий зөвлөлийн 2019 оны жил тутмын хурал Женев дэх төв байранд хоёр хоног үргэлжилж өндөрлөжээ. Энэ удаагийн хурал нэлээд шахуу хөтөлбөртэй болж, Дэлхийн худалдааны байгууллагын гишүүдийн хэдэн сарын турш хэлэлцэж боловсруулсан давж заалдах байгууллагыг сайжруулах тухай ерөнхий зөвлөлийн тогтоолын төслийг хэлэлцсэн байна. Гэвч уг төсөл АНУ-ын байр сууриас болж батлагдаж чадаагүй ажээ. Ийнхүү Давж заалдах байгууллага өнөөдрөөс эхлэн үйл ажиллагаагаа зогсоооор болсон байна.
"Дэлхийн худалдааны байгууллагын гишүүд давж заалдах байгууллагыг сайжруулах тухай ерөнхий зөвлөлийн тогтоолын төслийн талаар нийтлэг ойлголтод хүрч чадаагүй учраас давж заалдах байгууллага 11-нээс шинэ маргааныг таслан шийдсэн талаар хянан шалгах боломжгүй боллоо. Ийм нөхцөлд Дэлхийн худалдааны байгууллагын дүрэм хүчинтэй гэдгийг онцлон дурдах шаардлагатай. Дийлэнх гишүүд Дэлхийн худалдааны байгууллагын хуулийн үндсэн зарчмыг үргэлжлэн мөрдөж, эдийн засгийн ашиг сонирхлоо хамгаалах болно. Үүний зэрэгцээ худалдааны түншүүдтэй сайн харилцаатай байхыг бид хүсэж байна” хэмээн Дэлхийн худалдааны байгууллагын ерөнхий захирал Роберто Азеведо өчигдөр зарласан хэвлэлийн бага хурал дээр мэдэгджээ.
Дэлхийн худалдааны байгууллага байгуулагдсанаас хойших 25 жилийн туршид маргааныг шийдвэрлэх механизм чухал үүрэг гүйцэтгэсээр ирсэн бөгөөд мэргэжилтний хэсэг, давж заалдах байгууллага 200 гаруй маргааныг таслан шийдсэн байна. Холбогдох тогтоолын дагуу Дэлхийн худалдааны байгууллагын давж заалдах байгууллага суурин 7 шүүгчтэй бөгөөд нэг асуудлыг гурван шүүгч хамтран хэлэлцдэг юм.
Давж заалдах байгууллагын шүүгчийн улиран сонгогдох, сонгон элсүүлэх талаар АНУ байр суурийн зөрөөтэй байсны улмаас тус байгууллага 2018 оны нэгдүгээр сараас БНХАУ, АНУ, Энэтхэг улсын гуравхан шүүгчтэй ажиллаж байжээ. Энэ сарын 10-нд АНУ, Энэтхэг улсын шүүгчийн албан тушаалын хугацаа дууссаны дараа Давж заалдах байгууллагад БНХАУ-ын ганц шүүгч үлдэж, хэргийг хянан шалгах аргагүй болсон нь энэ юм.
Давж заалдах байгууллага ажлаа зогсоосны үр дагаврын сөрөг нөлөөг хэрхэн багасгах талаар Дэлхийн худалдааны байгууллагын гишүүд хэлэлцэж буй бөгөөд Давж заалдах байгууллага урт хугацаанд хүчинтэй шийдвэрлэх төсөл эрэлхийлэх нь өнөөгийн тулгамдсан асуудал юм гэж тус байгууллагын тэргүүн онцолжээ.
Дэлхийн худалдааны байгууллагын Ерөнхий захирал Роберто Азеведо 12-р сарын 10-ны өдөр Швейцарийн Женев хотноо ДХБ-ын төв байранд болсон Ерөнхий зөвлөлийн хоёр өдрийн хуралдааны дараа хэвлэлийн бага хурал дээр үг хэллээ.