Залуу үеийнхний 23 хувь нь гар утаснаас хэт хамааралтай байна
Хүүхэд, залуусын дунд ухаалаг гар утасны хэрэглээ түүнд зарцуулах хугацаа ихсэхийн хирээр тэдний сэтгэц, зан араншинд өөрчлөлт ордог болохыг мэргэжлийн эмч хэлж байна. Мөн тэднийг гар утаснаас нь салгахад сэтгэл санааны гүн цочролд орж, уурлаж бухимддаг, гар утас хэрэглээд эхлэхээрээ хэр их хугацаа зарцуулж байгаагаа хянаж, хязгаарлаж чадахгүй болдог байна.
Сурагчид гар утсыг нь эцэг эхчүүд нь хураах, тэдэнд шаардлага тавих үед уур нь хүрч ойр байгаа буйдан ширээгээ цохиж бухимдлаа илэрхийлдэг тухай ярьсан юм. Гэхдээ тэд гар утсаар удаан тоглосноос болж үүсэж болзошгүй эрсдэлүүдийн талаар нүдний хараа муудан тархины судсыг гэмтээдэг зэргээр тодорхой хэмжээний мэдлэг, мэдээлэлтэй байсан юм.
Их Британийн “King’s College London” сургуулийн судлаачид залуу үеийнхний гар утасны хэрэглээний талаар судалгаа хийжээ. Судалгаанд залуу үеийн 42 мянга орчим төлөөллийг хамруулсан байна. Ингэхэд судалгаанд оролцогсдын 23 хувь нь гар утаснаас хэт хамааралтай болсныг тогтоожээ. Тодруулбал гар утаснаас хэт хамааралтай болсон залуус сэтгэл санааны хувьд байнга дарамттай, нойр дутагдалтай, хичээл сургуульдаа муудсан байгааг тогтоосон байна. Харин манай улсын тухайд СЭМҮТ-д сард 200-300 хүүхэд гар утас, цахим хэрэглээнээс болж ханддагаас 20-50 нь хэвтэн эмчлүүлдэг байна.
Хүүхэд гар утсанд донтон ууртай, бухимдуу болдог
СЭМҮТ-ийн поликлиникийн их эмч Т. Саранцэцэг “Хүүхдэд цахим хэрэглээнээс үүдэлтэй өөрчлөлтүүд тодорхой хэмжээгээр гардаг. Жишээ нь хүүхдийн нүд анивчина, хамар, хоолой нь гуншин дуугарна, хүзүү, толгойгоо байнга хөдөлгөнө. Эдгээр нь хэсэг булчингууд чангарснаас үүсдэг ядаргааны шинж тэмдгүүд юм. Түүний дараа хүүхдэд зан төлөвийн өөрчлөлтүүд илэрч, ууртай, уцаартай, бухимдуу болдог. Хүүхэд өсвөр насандаа хөгжиж, өсөж байдаг. Гэтэл энэ үед утас хэт их оролдож сууснаар биеийн хөгжил хоцордог. Харин эсрэгээрээ спортоор хичээллэсэн хүүхдийн биеийн хөгжил сайн байх жишээтэй”
Сургуулийн багш, нийгмийн ажилчид сурагчдын ухаалаг гар утасны хэрэглээнд хяналт тавьж ажиллаж байгаа гэсэн юм. Тодруулбал Монгол Улсын Засгийн газрын 276 тогтоол гарснаас хойш 1-5-р ангийн буюу 10 хүртэлх насны сурагчдыг ухаалаг утас ашиглахыг нь хоригложээ.
Нэгдүгээр сургуулийн нийгмийн ажилтан Т. Одонгуа “Хүүхэд ухаалаг утас хэрэглэснээр түүндээ тоглоом суулган донтох, гар утсаа дээрэмдүүлэх асуудлууд маш их гардаг байсан. Өнгөрсөн хичээлийн жилээс сурагчдад ухаалаг гар утас хэрэглэхийг бүр мөсөн хорьсноор эдгээр асуудал багассан”
Хүүхэд, залуус гэлтгүй эцэг, эхчүүд ч мөн адил гар утсыг гэр орондоо их ашигладаг болсон. Тиймээс хамгийн түрүүнд эцэг эхчүүд үр хүүхдэдээ зөв үлгэр дуурайлал үзүүлж, утсыг хэрэглээ гэдэг талаас нь ашиглах, хүүхдүүдийнхээ гар утасны хэрэглээнд анхаарал хандуулж, тэдэнд хяналт тавьдаг байх шаардлагатай байгаа юм.
