БНСУ болон Шенгений орнуудын виз гаргаж өгнө гэж иргэдийг залилах тохиолдол буурахгүй байна
Виз найдвартай, хурдан хугацаанд гаргаж өгнө гэж иргэдийн залилах тохиолдол буурахгүй байгааг ЦЕГ-аас мэдээллээ. Тэр дундаа албан паспорт гаргаж өгнө хэмээн залилах гэмт хэрэг цөөнгүй гарч байна. Тухайлбал нэгэн иргэн ногоон паспорт гаргаж өгнө гэсэн этгээдэд 6.5 сая төгрөг өгч, залилуулжээ.
Албан паспорт учраас танил хүнээр дамжуулан гаргана гэж удаан хугацаанд хүлээлгэсээр эцэст нь сураггүй алга болжээ. Эхлээд 5 сая төгрөг өгч, дараа нь 1.5 сая төгрөгийг нэмж өгчээ. Түүнтэй ярьж байсан утасны дугаар холбогдохгүй, очиж уулзаж байсан ажлын байран дээр очиход түүнийг байхгүй гэжээ. Удалгүй тухайн иргэн залилуулснаа мэдэж цагдаад хандахаар болсон байна.
Хэн нэг этгээд ямар нэг хэлбэрээр албан паспорт гаргаж байгаа зарлал нь хууль бус төдийгүй залиланд тооцогддог юм. Учир нь Монгол Улсын паспорт нь төрийн өмч учир төрийн өмчийг хууль журам зөрчин авснаар эрүүгийн хариуцлага хүлээх эрсдэлтэй байдаг байна.
Албан паспорт гаргана гэх залилангаас гадна визний залилан буурахгүй байна. Гэхдээ хүмүүс залилуулаад цагдаад мэдэгдэж, бүртгүүлдэггүй нь энэ төрлийн гэмт хэрэг даамжрахад нөлөөлдөг байна. Тиймээс хэрвээ хэн нэгэнд залилуулсан бол заавал цагдаад мэдэгдэж байхыг санууллаа.
ЦЕГ-ын УСХ-ийн ахлах мэргэжилтэн, цагдаагийн хошууч Х.Хатанбаатар “Визний залилан нийт бүртгэгдсэн гэмт хэргийн 25-30 хувийг эзэлж байгаа. Манай иргэдийн ганц ойлгох ухамсарлах зүйл бол хувь хүнд виз гаргах болон бусад чиглэлээр мөнгө өгч болохгүй. Хэзээ ч хувь хүн ЭСЯ-аар дамжуулж виз гаргах боломж байхгүй” гэв.
Иргэдийг мөнгө өгсөн, авсан баримтаа үйлдэж, тухайн хүнээ сайн судалж, аман гэрээ хийхгүй байхыг сануулж байна. Судлаад үзэхэд өмнө нь залилангийн хэрэг үйлдэн шүүхээр ял шийтгэгдсэн этгээдүүд энэ төрлийн залилах гэмт хэрэг үйлддэг байна.
