Өнгөрсөн шөнө 18 иргэн угаарын хийнд хордон дуудлага өгчээ

Нийслэлийн мэргэжлийн хяналтын газраас сайжруулсан түлштэй холбоотой цаг үeийн асуудлаар мэдээлэл хийлээ.

Тус газрын дэд дарга С.Даваасүрэн мэдээлэхдээ “Өнгөрсөн шөнийн байдлаар Улаанбаатар хотод угаарын хийнд зургаан өрхийн  18 иргэн хордсон дуудлага өгчээ. Үүний зургаа нь хүүхэд, 12 нь насанд хүрсэн хүн байсан. Уг зургаан өрхийн хоёр нь гэрт, дөрөв нь байшинд амьдардаг. Дуудлагаар очиход гурван айлын зуух яндангийн холбоос буруу, хоёр айл нь үнсээ аваагүй, нэг нь түлшээ буруу түлсэн байв. Одоогоор эдгээр иргэдийн бие хэвийн. Бид мэдээлэл, зөвлөгөө өгсөн байгаа. Үүнээс гадна иргэдийн зүгээс түүхий нүүрс түлж буй талаар мэдээлэл ирж байна. Шалгахад сайжруулсан түлш түлсэн  боловч сайн асаагүйн улмаас хар утаа гарсан байсан. Үүнийг түүхий нүүрс түлсэн гэж андуурах тохиолдол байна.

Баянгол дүүргийн 7 хороо, "Говь" сауны баруун талд айл өрх болон дугуй засварууд утаа гаргасан асуудал үүссэн. Үүнд шалгалтын ажиллагаа явуулж Зөрчлийн хэрэг нээсэн. 2017 оноос Улаанбаатар хотыг бүсчилж тодорхой хороодод утаа гаргахгүй, зөвхөн цахилгаанаар дулаанаа хангах захирамж гарсан. Тухайн утаа гаргахыг хориглосон бүсд сайжруулсан шахмал түлш хэрэглэсэн зөрчил илэрч байна. Иргэд сайжруулсан түлш л бол аль ч хороо, бүсд түлж болно гэж буруу ойлгоод байна. Тодорхой хязгаар бий. Тиймээс аж ахуй нэгж, иргэд нийслэлийн бүсчлэлийг сайтар анхаарах хэрэгтэй" гэлээ. 

Агаарын чанартай мэдээллийн хувьд өнгөрсөн долоо хоногийн хувьд хүхэрлэг хий 2.4 дахин их, азотын давхар исэл өнгөрсөн оны мөн үетэй харьцуулахад ижил түвшинд, PM10 буюу том ширхэгт тоосонцрын хэмжээ өнгөрсөн оны энэ үетэй харьцуулахад 2.4 дахин бага, PM2.5 буюу нарийн ширхэгт тоосонцор 2.1 дахин бага хэмжигдсэн талаар нийслэлийн Агаарын бохирдолтой тэмцэх газрын мэргэжилтэн танилцууллаа. 

Өнгөрсөн долоо хоногийн Улаанбаатар хотын агаарын чанар бага бохирдолтой гэж гарчээ


Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд eagle.mn хариуцлага хүлээхгүй.

Сэтгэгдэл бичих (0)