Иргэний нисэхийн эрэн хайх, авран туслах дотоодын сургуулилалт эхэллээ

ИНЕГ-ын даргын тушаалаар нисэхийн эрэн хайх, авран туслах үйл ажиллагаанд голлон оролцогч байгууллагуудын төлөөллийг хамруулсан Иргэний нисэхийн эрэн хайх, авран туслах үйл ажиллагааны дотоодын сургуулилт Булган аймагт эхэллээ.

Манай улс ОХУ-ын нисэхийн эрэн хайх, авран туслах албадтай хамтран хоёр жилд нэг удаа энэ чиглэлийн дасгал сургуулилтыг хийдэг бөгөөд хоёр талын 6 дахь удаагийн хамтарсан сургуулилалт ирэх жил манай улсад болох юм. Тиймээс нисэхийн эрэн хайх, авран туслах үйл ажиллагаанд голлон оролцогч байгууллагууд нисэхийн эрэн хайх болзошгүй асуудал үүссэн үед хэрхэн ажиллах хамтын ажиллагааныхаа бэлэн байдлыг шалгахаар энэхүү дасгал сургуулилтыг хийж байна. Мөн анх удаагаа зохион байгуулж буй дотоодын сургуулилалтыг зориудаар цаг хүндэрсэн үед хэрхэн ажиллах талаар бодит байдалд ойртуулж, хамтран ажиллах байгууллагуудын бэлтгэл ажил хэр байгаа, хамтын ажиллагааны уялдаа холбоо хэрхэн хангагдаж байгааг шалгаж буйгаараа онцлог гэдгийг тус сургуулилтыг ахлан ажиллаж буй ИНЕГ-ын Тэргүүн дэд дарга Б.Алтанцом онцоллоо.

Сургуулилалтад нисэхийн эрэн хайх, авран туслах үйл ажиллагаанд голлон оролцогч байгууллагууд болох ИНЕГ болон түүний харьяа байгууллагуудын 28, ОБЕГ-ын Үндэсний аврах бригадын 30, ЗХЖШ-ын Агаарын цэргийн ангийн Улсын нисэхийн эрэн хайх, авран туслах үйл ажиллагааны зориулалт бүхий Ми-171Е нисдэг тэрэгний нисгэх багийнхан гээд нийтдээ 60 гаруй хүний бие бүрэлдэхүүн оролцож байна. Мөн Булган аймгийн нисэх буудал, Аймгийн Засаг даргын Тамгын газар болон орон нутгийн цагдаа, тагнуул, эмнэлэг, онцгой байдлын албаны төлөөлөгчид өөр өөрийн үүргийн дагуу тус сургуулилтад оролцож байна. Түүнчлэн Булган нисэх буудалтай хамгийн ойр Мөрөн нисэх буудлын хамт олон ажиглагч болон дэмжин ажиллах чиглэлээр хамтран ажиллаж байгаа юм.


Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд eagle.mn хариуцлага хүлээхгүй.

Сэтгэгдэл бичих (0)