Монгол Улсын Ерөнхий сайдын 2015 оны нэгдүгээр сарын 23-ны “Ажлын хэсэг байгуулах тухай” 27, 2015 оны дөрөвдүгээр сарын 13-ны “Удирдамж батлах тухай” 94, 2015 оны дөрөвдүгээр сарын 16-ны “Гарын үсэг зурах эрх олгох тухай” 99, 2015 оны тавдугаар сарын 15-ны “Эрх олгох тухай” 123 дугаар захирамж гаргажээ. “Дархан Монгол ногоон нэгдэл” НҮТББ Засгийн газар шийдвэрлэх асуудлыг Ерөнхий сайд дангаар шийдвэрлэсэн хууль бус гэж үзэн нийслэлийн Захиргааны хэргийн шүүхэд хандсан байна. Тодруулбал, Ерөнхий сайд Ч.Сайханбилэгийн 2015 онд гаргасан дээрх захирамжуудыг хууль бус гэж үзсэн байна.

“Дархан Монгол ногоон нэгдэл” НҮТББ энэхүү нэхэмжлэлийг нийслэл дэх Захиргааны хэргийн анхан шатны шүүхийн өчигдөр хянан хэлэлцээд дээрх захирамжуудыг илт хууль бус болохыг тогтоосон юм. Шүүх шийдвэрээ танилцуулахдаа "Уг маргаан нь “Оюутолгой” болон “Дубайн гэрээ”-г илт хууль бусад тооцсон буюу гэрээтэй холбоотой маргаан биш, захиргааны байгууллага буюу Монгол Улсын Ерөнхий сайдын шийдвэр хуульд нийцсэн эсэхтэй холбоотой маргаан болно" гэсэн юм. Гэвч "Дубайн гэрээ" хүчингүй боллоо гэсэн ойлголт нийгэмд бий болсон. Үүнтэй холбогдуулан ҮАБЗ өргөтгөсөн бүрэлдэхүүнээр хуралдаж уг асуудлыг хэлэлцэж байна. Тухайлбал, УИХ-ын гишүүн Х.Болорчулуун тэргүүтэй гишүүд ҮАБЗ-ийн хуралд оролцож байгаа ажээ.