"Тэмбүүг устгая" аянаар 218000 хүнд үзлэг, шинжилгээ хийжээ
Эрүүл мэндийн яамнаас өнөөдөр “Халдварт өвчнөөс сэргийлэх хянах үндэсний хөтөлбөр, Тэмбүүг устгая” аяны үр дүн, явцын талаар мэдээлэл хийлээ.
Тэмбүү, ХДХВ-ийн халдвар илрүүлэх үзлэг шинжилгээг халдварт болон халдварт бус өвчний илрүүлэг үзлэгтэй хамтатган аймаг бүр өөрийн онцлогт тохируулан зохион байгуулж, 96.289 иргэнд шинжилгээ хийж, 765 тэмбүүгийн шинэ тохиолдлыг илрүүлэн, эмчилгээнд хамруулжээ.
Түүнчлэн өндөр эрсдэлт бүлгийн 1271 хүн, Баянхонгор, Дорноговь, Дорнод, Дундговь, Орхон, Өмнөговь, Сүхбаатар, Сэлэнгэ, Төв, Ховд зэрэг 10 аймагт уул уурхайн чиглэлээр үйл ажиллагаа эрхэлдэг аж ахуйн нэгжийн 6000 гаруй ажилчин, зургаан аймгийн 10 сумын 38 аж ахуйн нэгжийн 870 гар аргаар алт олборлогч, 15 аймгийн алсын тээврийн 2140 жолооч зэрэг нийт 20620 хүнийг үзлэг шинжилгээнд хамруулсан байна. Ингэхэд 279 тэмбүүгийн шинэ тохиолдол, 16000 гаруй оюутан, 1663 орон гэргүй иргэнээс 219 тэмбүүгийн тохиолдол илрүүлэн эмчилжээ. “Тэмбүүг устгая” үйл ажиллагааг эрчимжүүлснээс хойш дөрвөн сарын хугацаанд нийтдээ улсын хэмжээнд 218000 гаруй иргэнд үзлэг шинжилгээ хийж, тэмбүүгийн 3682 тохиолдол, 1716 хавьтлыг илрүүлсэн гэнэ.
Энэ оны эхний арван сард гэхэд бэлгийн замаар дамжих халдварын 13685 тохиолдол бүртгэгдсэн нь нийт халдварт өвчний дунд 38.0 хувийг эзэлж байгаа юм байна. Бэлгийн замаар дамжих халдварын 40.3 хувийг тэмбүүгийн өвчлөл эзэлж, 5517 тохиолдол бүртгэгджээ. Тэмбүүгийн өвчлөл өмнөх оны мөн үетэй харьцуулахад 503 тохиолдлоор нэмэгдсэн нь "Тэмбүүг устгая" үйл ажиллагааны хүрээнд явагдсан илрүүлэг шинжилгээний үр дүн гэж үзэж хэвлэлийн хурлын үеэр хэлэв.