Францын "Шар хантаазтан"-ууд Парис, Нанте, Лион зэрэг хотод цагдаа нартай мөргөлдөөн үүсгэжээ. Парисын цагдаагийн газар жагсагчдаас 147 хүнийг баривчилсан байна. Францын "Ле Фигаро" сонинд мэдээлснээр, зарим этгээд дэлгүүр, банк, баар болон олон нийтийн бусад хэрэгслийг эвдэж, цагдаа нар тэднийг тараах явцад мөргөлдөөн үүссэн байна. Италийн талбайд эмх замбараагүй байдал даамжирснаас болж Францын цагдаагийн газар мөн өдрөөс эхлэн уг талбайд жагсах зөвшөөрлийг цуцалжээ. Жагсаалаас болж Парисын метроны хотын төвийн хэдэн буудлыг хаасан байна. Зарим жагсагч Парисын замыг хааж, хотын замын хөдөлгөөнд нөлөөлсөн байна.
2018 оны арваннэгдүгээр сарын 17-нд Францын засгийн газраас шатахууны татварыг нэмэгдүүлснийг эсэргүүцэж "Шар хантаазтан"-уудын хөдөлгөөн эхэлсэн юм. Тус хөдөлгөөнийхөн бямба гараг бүр жагсаж, олон удаа цагдаагийн газар ба жагсагчдын хооронд хүчтэй мөргөлдөөн гарч байсан билээ. Орон нутгийн хэвлэлийн мэдээлснээр, Францын засгийн газар олон хариу арга хэмжээ авсны үр дүнд "Шар хантаазтан"-уудын хөдөлгөөний эрч улам буурч байгаа гэнэ.
