Барилгын зарим тусгай зөвшөөрлийг авах үйл явц хүндрэл чирэгдэлгүй болжээ
БХБЯ-наас олгодог байсан зарим зөвшөөрлийг мэргэжлийн холбоодод шилжүүлээд жил гаруйн хугацаа өнгөрч байгаа юм. Барилгын ажил эхлүүлэх, зураг төслийг эхлүүлэх зэрэг 4 зөвшөөрлийг мэргэжлийн холбоод цахимаар олгож эхэлснээр өмнө нь гардаг байсан хүндрэлүүд үгүй болсон байна.
Барилгын байгууламжтай холбоотой төрийн бус 8 байгууллагыг Монголын барилгын үндэсний ассоциаци тэргүүлэн түншлэл болж, БХБЯ-тай хамтран ажиллах гэрээ байгуулан төрийн зарим чиг үүргийг шилжүүлэн авсан юм. Тэд барилгын ажил эхлүүлэх зөвшөөрөл, зураг төсөл эхлүүлэх зөвшөөрөл, мөн өргөх зөөх байгууламжийн угсралт, засвар үйлчилгээний зөвшөөрлийг 10 хоногийн дотор олгож байна.
Мэргэжлийн холбоод нь ингэж төрийн зарим үүргийг авснаар төрийн албаны хүнд суртал, бизнес эрхлэгчдэд учирдаг байсан чирэгдэл үгүй болж байгаа юм. Яам нь ч бодлогоо тодорхойлох, стратеги боловсруулдаг үндсэн чиг үүрэгтээ анхаарч, ачаалал нь багассан байна.
Мэргэжлийн холбоодын түншлэлд 3 төрлийн зөвшөөрөл олгох эрхийг шилжүүлсэн бол барилгын материал үйлдвэрлэх зөвшөөрлийг барилгын материал үйлдвэрлэгчдийн холбоо хариуцдаг болсон юм. Мэргэжлийн холбоодыг энэ чиглэлээр ажиллахад нь хамтрах, хувийн хэвшил дэх авилгын эрсдлийг бууруулах, өрсөлдөөний шударга байдлыг хангах зэрэгт АТГ дэмжлэг үзүүлэн ажиллаж байгаа юм.