Барилгын салбарын хүлэмжийн хийн ялгарлыг бууруулахаар Барилга хот байгуулалтын яам олон улсын байгууллагуудтай хамтран ажиллаж байна. 2012 оны байдлаар нийт хүлэмжийн хийн 52 хувийг эрчим хүчний салбар дангаар ялгаруулсан байдаг бол эрчим хүчний хэрэглээний 40 хувийг барилгын салбар эзэлдэг юм. Тиймээс ногоон барилга бий болгох, эрчим хүч, дулааныг хэмнэх, байгальд ээлтэй материал ашиглах зайлшгүй шаардлага барилгын салбарт байгаа юм.
Өнөөдрийн байдлаар Монгол улсын барилгын салбар хүлэмжийн хийн ялгаралд ингэж нөлөөлж байна гэх тодорхой тоо байхгүй. Тиймээс барилгын салбар дахь хүлэмжийн хийн ялгарлыг тоолохоос эхлээд бууруулах, уур амьсгалын өөрчлөлтөнд тодорхой эерэг үр дүн үзүүлэх шаардлага бий. Энэ шаардлагыг биелүүлэхийн тулд БХБЯ, НҮБ-ын хөгжлийн хөтөлбөртэй хамтран НАМА төслийг хэрэгжүүлж байна.
Барилгын салбарын хүлэмжийн хийн ялгарлыг бууруулахын тулд ногоон барилга гэдэг тодорхойлолтыг бий болгох хэрэгтэй. Ногоон барилга гэдэг нь цахилгаан, дулаан, усны хувьд хэмнэлттэй, ашигласан материал нь эрчим хүчний хэмнэлт шингэсэн эсэх гэсэн гурван үнэлгээтэй байдаг байна. Энэ 3 үнэлгээг багтаасан программ хангамжийг Mонголд нэвтрүүлж эхлээд байгаа юм. Ногоон барилгын үнэлгээний систем, санхүүжилт авах арга замын тухай нэгдсэн ойлголт салбарынханд хэрэгтэй учраас БХБЯ-ны Ногоон барилгын зөвлөлөөс семинар зохион байгуулсан юм.
Монгол улсын ногоон хөгжлийн бодлогод 2020 он гэхэд барилгын дулааны алдагдлыг 20 хувиар бууруулах зорилт тавьсан. БХБЯ олон улсын байгууллагуудтай хамтран хэрэгжүүлж байгаа төсөл хөтөлбөрийн үр дүнд энэ зорилтонд хүрнэ гэж төсөөлж байгаа юм.
